Gesina Lechte-Siemer

Margaretha Grosser un Gesina Lechte (gjuchts) baale uur Uutgoawe fon hiere Geskrifte bie Gesina touhuus ap n 23. Sept. 2004.

Toanksteen foar Gesina Lechte-Siemer bie ju Roomelster Säärke

Gesina Siemer (*13. Oktober 1911 in Roomelse; † 6. August 2007 in Ait) wuuks in Roomelse ap as Dochter fon dän Smid Nikolaus Siemer. Fon Siemer kon me kweede, dät ju as eerste in dät Seelterske dichtede.

Lieuwend

Ju beginde 1928 mäd dichtjen, wierbie ju ap Anräägenge fon Pestoor Kokenge hiere seelter Määmesproake benutsede. In ju Skrieuwwiese kuud ju sik deerbie stutsje ap ju seelter Spräkwoudesamlenge, ju Julius Bröring 1901 hääruutroat hiede.

Hiere eerste Gedicht – wäil Din unbekoande Stierwedai - waas ätter ne Preetenje fon dän Pestoor. Do Gedichte ärskeenen domoals in do Heimatblätter fon ju Oldenburgische Volkszeitung. Ju häd Louts Hinerks Tjoue (hiere eensige Prosa) in 1931-32 skrieuwen. Ätters hilkede ju ätter dät Rhienlound un dan ap t Oaler sätten jo sik in Ait deel.

Ätter 1970 is ju fääre geen mäd skrieuwen. Hiere Dichtsammelnenge is in 1977 in Ju Seelter Kroune ärskienen. Louts Hinerks Tjoue is leeter nochmoal in Seelter Tjoue uutroat. As Hermann Janssen uut Amerikoa tourääch keem häd hie foar ju Säitenge skrieuwen (Lesebouk foar Seelterlound, 1953-1965) un ferskäidene Gedichte fon Siemer publiziert.

In 2007 sunt two Bouke fon Siemer ärskienen, Dät ganse Lieuwend un Fiene Stemmen.

Toanksteen

Ap 6. August 2008, an hieren eersten Stierwedai, is foar Gesina Lechte-Siemer n Toanksteen deelsät. Die stoant bie dät naie "Pfarrheim" an ju Määrkedsträite in Roomelse.

Thema

Dät Wierk fon Siemers belukt sik ap Dööntjene fon do Jierstiede, dät Lieuwend fon alle Deege un uur dät Seelterlound un sien Geskichte.

Wierke

1953-65 Ferskeedene Gedichte in dät Lesebouk foar Seelterlound
1971 : Louts Hinerks Tjoue, Seelter Trjoue. N Tjooterstuk in fjauer Deele, skrieuwen 1931 of 1932. 45 Sieden.
1977 : Ju Seelter Kroune. Ostendorp Verlag Rhauderfehn. Mäd Bielden uut Seelterlound fon Bruno Ewen. 124 Sieden.
2004 : Dät ganse Lieuwend, Seelterfräiske Gedichte un Läidere. Ait/ Friesoythe. 107 Sieden.
2004 : Fiene Stemmen, Seelterfräiske Gedichte un n Läidere foar litje Bäidene. Romelse – Seelterlound. 61 Sieden.

Bielde

Gesina hier eerste Gedicht Din unbekoande Stierwedai, dät ju - 18 Jiere oold - skreeuw ap ne Preetenje fon Pestoor Kokenge.
Dät Gedicht Aadentied in Gesina hiere oaine Hondskrift.
Dätsälge Gedicht Aadentied in Botke sien Bouk Sealterlân.
Dät Gedicht Foarjiersdai in de Meerte, so as dät ärskeen in ju Oldenburgische Volkszeitung fon dän 20. Meerte 1935.
Ounfangssiede fon ju Hondskrift fon dät Tjooterstuk Louts Hinerks Tjoue (ärskienen Seelter Trjoue 6:1-48 (1971).
Fiene Stemmen, 2004
Dät ganse Lieuwend, 2004