Hermann Janssen

Uut Wikipedia
Janssen uut 1958
Touhoopebuunen is dät Lesebouk wuddelk tou n tjuk Bouk wuuden.
Two Sieden fon ju Tiedskrift Seelter Trjoue 4-4-8/9 (Häärst 1969)
Ju Tuunkeräi fon Hermann Janssen, 1920er Jiere, däälich dät Kantoor fon dät Moorgut Koch

Hermann Janssen (sen.) waas bädden dän 8. Oktober 1888 in Roomelse as Tuunkerssuun. In do 1920-er Jiere wonnerde hie uut ätter Amerikoa uum in ju Geegend fon Cincinnati in jusälge Wirtskup sien Gluk tou fersäiken. Kroankhaid fon sien Moanske broachte ju Familie tourääch ätter Roomelse, wier hie dan mäd Ärfoulch dän oolde Bedrieuw foutsätte mäd Boomskoulen, Stiefmutterken usw.

Hermann Janssen waas Mee-Apgjuchter fon dän Seelterbuund fon 1952 un Meeglied fon dän Tweelwerräid. As dan 1953 do Saitengsstukke Lesebouk foar Seelterlound in dän General Anzeiger ounfängen, waas Janssen die wichtichste un ätter eenige Tied bolde die eensichste Mee-Oarbaider. Janssen uursätte maast Stukke uut dät Düütske un deerbie geen dät him moor uum algemeene Anweendenge (Geböärnisse, Geskichte, Technik) as uum literariske Qualität. Sien Wällen wieren also n Leesebouk fon ju roomelster Foulksskoule uut 1900, n Bäidensbouk, Saitengsstukke un populär-wietenskuppelke Bouke. Daach hie feroarbaidede uk sien Kunde fon t.B. Plonten un besunners ju Iemetucht in do Stukke, as uk oolde Fertälstere un Geböärnisse uut Seelterlound. Besunner sunt sien Samlengen fon Räätsele un Spräkwoude, wier hie sik maast gruundede ap Bröring, man uk Näies biebroachte. Uk roate hie ganse Woudeliesten. So geen hie mäd Uutduur fääre, bit dät ju Saitenge ätter 378 Sieden dät Lesebouk 1965 be-eendede.

Man Janssen waas noch goarnit uutskrieuwen un so wuud hie 1966 die wichtichste Mee-Oarbaider fon ju näie Tiedskrift Seelter Trjoue. Hier geen hie fäare mäd foarallen historiske Stukke, man uk oolde Fertälstere un eenige Gedichte. Besunner is uk sien Lieste fon Roomelster Huusnoomen. Sien lääste Stuk uur Säärkenbauen in Roomelse ärskeen in ju Nuumer fon Häärst 1970. Ap n 5. April 1971 is Hermann Janssen stuurwen. Hie häd bolde bit tou sien Eende skrieuwen un waas fielicht die produktivste seelter Skrieuwer. Truch dät Uursätten fon do ferskeedenste Texte häd hie uk n slonken Wai tou Sproakuutbau wiesd, un deermäd tou disse seelter Wikipedia.

Uut n Bräif fon Hermann Janssen, 5.5. 1966:

“Us Seelter Buund is ap n Huund. Awick/ Scharrel & E. Wallschlag/Utende, do sunt dood. Junge Ljude moakje noch nit mee; ljauer Foutbal spielje un Eurovision bikiekje, as ut do oolde Tieden schriue. Us Heinrich Kramer is uur 80 un meldet sik ou fon alle Amtere. Ik bän uk 77 Jier un kon neen Ferflichtungen moor oungunge.”

Man n Aantje fääre: “Ju Idee mäd n litje Saitenge mai ik wäil liede”. (Un so is dan mäd “Seelter Trjoue” (1966-1972) ounfangd.)

Uutgoawen[Beoarbaidje | beoarbaidje Wältext]

  • Deer waas iensen 'n oold Wieu, Fertelster foar Bäidene, ätter Seeltersk uursät fon Hermann Janssen, Lavermann Drachten, 1960
  • Dät Ooldenhuus, Ostendorp, Hermann Janssen un Pyt Kramer, Westrhauderfehn 1964. 80 Sieden.
  • Ne Koare ful Spoas, utsoachte Stukke ut dät Feentjer Blääd. Utgoawe Seelter Trjoue, 1972. 48 Sieden.
  • Lesebouk foar Seelterlound, 1953-1965, 378 Sieden.
  • Seelter Trjoue, Tidschrift foar alle Seelter, Hermann Janssen un Pyt Kramer, 1966-1972

Sjuch uk[Beoarbaidje | beoarbaidje Wältext]