Seelter Trjoue

Uut Wikipedia
Wikselje tou: Navigation, Säike (08)
Two Sieden fon ju Tiedschrift Seelter Trjoue 4-4-8/9 (Häärst 1969)
Uumesleek Seelter Trjoue, Sumer 1969

As dät Lesebouk foar Seelterlound apheerde, fängen Hermann Janssen un Pyt Kramer oun mäd Seelter Trjoue, Tidschrift foar alle Seelter. Disse eerste wuudelke seelter Tiedschrift ärscheen bloot schablonierd in jierelk fjauer Goawen fon 12 Sieden. Dät fäng oun in n Suumer 1966 un die soogende un lääste Jiergong koom 1972.

Meeoarbaidere[Beoarbaidje | Quelltext bearbeiten]

Ju eerste Nummer bjut bloot Biedraage fon Kramer, man ju twäide Nummer fäng Janssen al oun mäd sien Serie Ap do Spuren fon do Seelter Fräisen, (leeter Ap do Foutstappen fon us Foarfoaren. Fääre bood dät Blääd Geriemsele, Seekgeschichte, wät uur ju Sproake, n Rubrik foar do Bäidene un n Serienroman. Leeter lääwerde Janssen uk noch Fertälstere uut Seelterlound un Sproak-Unnergjucht foar do Bäidene as uk Stukke uur ju näie politiske un moanskelke Geschichte. 1967 koom uk n Biedraach uur ju Sproake fon n amerikoansken Professor, Marron C. Fort, die dän Winter toun eersten Moal Seelterlound besoachte. Dän uur Winter lääwerde Fort uk noch n Geschichte. So geen dät aal fääre. Dan ärscheenen moal n poor litje Teekengen un n Lieste fon Pestoore un Huusnoomen (mäd Koarten) un Spitsnoomen. Tjooter foont sik 1969 mäd n Twiegespräk fon Gesina Dumstorf, ätter dät al eer n oolden fon Pestoor Schulte roat waas. In n füfte Jiergong fängen dan do Biedraagen oun fon Herman Ahlrichs uut Cincinnati uur dät Lieuwend fon do Seelter in Amerikoa. Dan rakt et uk n Äntwurp foar n seelter Flaage. Ap n 5. April 1971 is Hermann Janssen stuurwen, ätter dät hie al n poor Mounde nit moor schrieuwen hiede. Die soogendie Jiergong fangt noch oun mäd n ätterlät Stuk fon him, man deermäd waas ju Tiedschrift daach die wichtichste Meeoarbaider loos un ju heerde ap. As lääste ärscheenen noch n poor grattere Sunneruutgoawen: 1971 Louts Hinerks Tjoue, n Tjooterstuk fon Gesina Lechte-Siemer uut 1931/32 un 1972 Ne Koare ful Spoas, n Uutwoal fon Stukke uut dät Lesebouk.

Aploage[Beoarbaidje | Quelltext bearbeiten]

Eerste kuud me sik bloot abonnierje uur de Post, man ju twäide Nummer rakt al in älke Täärp ne Ouhoaladrässe. N grooten Ärfoulch wuud dät oawers nit un ju Aploage koom nit buppe n 100 Stuk. Do Ljuude wieren domoals wäil uk nit so an t Leesen woand.