Seelter Dööntjene un Fertälstere

Ju Seelter Dööntjene un Fertälstere sünt moorere Riegen Geskichten, do in ju Münsterländische Tageszeitung, dän General-Anzeiger un ju Nordwest-Zeitung ferskeenen sünt.

Theo Deddens

Fon 1977 bit in 1990 publizierde Theo Deddens Dööntjene ut Seelterlound in ju Münsterländische Tageszeitung, mädnunner juun 300 Stukke. Oafte wieren dät Uursättengen fon spoasige Stukke uut de platdüütske Noaberskup, man uk Geböärnisse uut Seelterlound fon fröier un nuu. Do Stukke sünt noch nit ap Internet archiwiert. Däälich skrift Theo Deddens af un tou noch litje Dööntjene uut Skäddel in dän General-Anzeiger.

Gretchen Grosser

Ätter hiere Pensionierenge fäng Gretchen Grosser oun mäd seelter Stukke in dän General Anzeiger. Deerieuwenske häd ju uk fuul Stukke in tjo Bouke hääruutroat. Hiere Stukke honnelje sik uum spoasige un iedenste Geböärnisse in dät Deegeslieuwend. Do sunt maast uut n persöönelken Standpunkt skrieuwen wuuden. Do Stukke ferskiene däälich noch in dän General-Anzeiger un in ju Nordwest-Zeitung. Do Geskichten siet dät Jier 2000, mädnunner juun 500 Stuk, sunt uk ap Internet tou fienden.

Theo Griep

Där ieuwenske häd Theo Griep 2002 n Bouk mäd Dööntjene un uure Seeken heruutbroacht mäd dän Titel: Twiske Ticheläi un Baarenbierich.

Hermann Janssen un Pyt Kramer

Dät Ooldenhuus is n Bouk fon Hermann Janssen un Pyt Kramer mäd Dööntjene un Fertästere (1964). Dät Lesebouk foar Seelterlound in dän General Anzeiger was fon 1953 - 1965 ne Riege fon Hermann Janssen mäd touhoope 378 Sieden, wier uk fuul Dööntjene un Fertälstere in tou fiende sünt. 1966 - 1971 was hie ieuwenske Pyt Kramer die wichtichste Meeoarbaider fon ju näie Tiedschrift Seelter Trjoue. Hier geen hie fäare mäd foarallen historieske Stukke, man uk oolde Fertälster.

Där wieren also moan n poar Skrieuwer, do mäd hiere Fertälster fuul kostboare Begjuchte uut oolde Tieden un dät Lieuwend fon fröier ätterleeten hääbe.

Minssen, Bröring un Strackerjan

In Juunsats tou do Geskichten fon do Skrieuwere uut de Naitied änthoolde do Geskichten fon Strackerjan, Bröring, un Minssen uut ju Tied uum 1900 fuul Uurgloowe un Soagen.

Bouke un Tidskrifte

M. Grosser: Dööntjen un Fertälstere uut Seelterlound, Beend 1, Roomelse 1992, 56 Sieden
M. Grooser: Dööntjen un Fertälstere uut Seelterlound, Beend 2, Roomelse 1993, 60 Sieden
M. Grosser: Dööntjen un Fertälstere uut Seelterlound, Beend 3, Roomelse 1994, 58 Sieden
Theo Griep: Twiske Ticheläi un Baarenbierich, Dööntjene, Gedichte un Tiedgeschichte uut un ätter dän twäide Waareldkriech, 2002.
H. Janssen un P. Kramer: Dät Ooldenhuus, Ostendorp-Ferlach, Westrhauderfehn, 1964. 80 Sieden.
H. Janssen: Lesebouk foar Seelterlound, 1953-1965, 378 Sieden.
H. Janssen un P. Kramer: Seelter Trjoue, Tidschrift foar alle Seelter, Hermann Janssen un Pyt Kramer, 1966-1972

Sjuch uk

Seelterfräiske Literatuur
Fertälstere fon Minssen, Bröring un Strackerjan

Ferbiendenge ätter buuten

Wikisource: Ludwig Strackerjan ap Seeltersk – Wällensammelenge

Wikisource: Strackerjan: Aberglaube und Sagen aus dem Herzogtum Oldenburg ap Lääichdüütsk – Wällensammelenge