Rhien

Uut Wikipedia
Fljootgebiet fon dän Rhien
(Koart op Niederloundsk)

Die Rhien is ne Äi in Europa, ju Äi is 1.230 km loang. Die Rhien fljut truch ju Swaits, Liechtensteen, Aastriek, Frankriek, Düütsklound un do Niederlounde.

Ferloop[Beoarbaidje | beoarbaidje Wältext]

Do bee wichtichste Wäl-Äien buppe in do Swaitser Alpen sunt die Faander-Rhien un die Bääter-Rhien. Jo fljoote in Reichenau ap'e Naite fon Chur in Graubünden touhoope, wier die Alpen-Rhien bie äntstoant. Die Alpenrhien fljut fon Graubünden uut een Antje loangs dät Skeed twiske ju Swaits ap'e eene, Liechtensteen un Aastriek ap'e uur Siede.

Bie Hard, ap'e Naite fon Bregenz in't aastriekiske Buundeslound Vorarlberg, fljut die Alpenrhien in dän Bodensee. Die Bodensee, iendeeld in Buppersee un Unnersee, do truch dän See-Rhien bie Konstanz ferbuunen sunt, tält al tou dän Hoochrhien. Die gungt unner dän Bodensee noch fääre bit ätter Basel. Ju wichtichste Äi, ju in dän Hoochrhien fljut, is ju Aare. Dät is uk ju loangste Äi, ju bloot in'e Swaits ferlopt. Bekoand is die Hoochrhien uk foar dän Rhienfaal bie Schaffhausen

Die Bupperrhien twiske Basel un Bingen häd two wichtige Sieden-Äien fon gjuchts, näämelk dän Neckar bie Mannheim un dän Main ap dät Juunouger juunuur Mainz. Fon links kuume, bie Straßbuurich, ju Ill, un bie Bingen, wier die Bupperrhien eendet, ju Nahe.

Unner ju Nahe-Mundenge bie Bingen begint die Middel-Rhien. Bie Koblenz mundet ju Mosel in dän Rhien, juunuur fon Koblenz kumt ap dät uur Ouger ju Lahn fon gjuchts. Die Middelrhien gungt bit Bonn, wier (ap't uur Ouger) fon gjuchts ju Sieg oanefljut.

Unner Bonn begint die Läige Rhien. Wichtige Äien, do deer oanefljoote, sunt Ruhr un Lippe. Noudwäästelk fon Emmerich un Kleve roaket die Rhien dät Skeed fon do Niederlounde.

Ap Niederloundsk Rebät begint die Delta-Rhien: Die Stroom deelt sik ap in do Äien Waal, Ijssel un Lek. Bloot die Ijssel fljut ätter dät Ijselmeer, do uur fljoote ätter de Noudsee. Die Rhien is een fon do drokste Woatersträiten ap de Waareld.