Antigua un Barbuda

Uut Wikipedia
Zur Navigation springen Zur Suche springen
Antigua and Barbuda
Flaage fon Antigua un Barbuda Woapen fon Antigua un Barbuda
Flaage Woapen
Woalspruch: "Each Endeavouring, All Achieving"
Nationoalhymne: Fair Antigua, We Salute Thee
Steede fon Antigua un Barbuda
Amtssproake Ängelsk
Haudstääd Saint John's
Stoatsfoarm parlemäntoariske Monarchie
Gebiet
Fläche

442 km²
Ienwoonere (2015) 92.436 (209,1 km²)
Munte Aastkaribisken Dollar (XCD)
Tiedzone UTC -4
Fierdai 1. November
Loundkode ATG
TLD .ag
Telefonfoarwoal 1268

Antigua un Barbuda (ängelsk: Antigua and Barbuda) is aan uunouhongigen Stoat binne dän Commonwealth, die twiske dän Noud-Atlantik un ju Karibik lait, suudaastelk fon Puerto Rico in do Litje Antillen. Die Stoat wuude uut do Ailounde Antigua un Barbuda bilged, uk dät oulaine, uunbewoonde Ailound Redonda heert deer tou.

Geskichte[Beoarbaidje | Quelltext bearbeiten]

Fon sowät 10.000 f. Kr. an wuude dät Ailound eerstmoals fon Indioanere besiedeld. Die ienheemske Stom fon do Siboney wuude bit 1200 fon do Arawak-Indioanere fertroangen. Leeter fällen do Kariben uut Suudamerikoa ien un ferspratten sik in dät Rebät.

In't Jier 1493 loundede Christoph Kolumbus in Antigua. In do foulgjende Jiere wuuden do Indioanere ap do Ailounde fangen nuumen un as Sklouen ätter Hispaniola un in uur spoanske Kolonien broacht. Aan grooten Deel fon do Indioanere stoorf binne kuute Tied an do Foulgen fon ju hädde Oarbaid of an Kroankhaide. Ätter 1500 fersoachten Spoaniere, Frantsoosen un Briten ouwikseljend, man älken sunner Ärfoulch, do Ailounde duurhoaftich tou besiedeljen un in hieren Besit tou brangen. Seeroowere bruukten tou düsse Tied do Ailounde, uum sik tourääch tou luuken.

Moor as hunnerd Jiere leeter koom Barbuda (1628) in britisken Besit. Ju Regierenge moakede sik Moite, dät Ailound besiedeljen tou läiten, man dät slumpede nit. Fjauer Jiere ätters wuude Antigua fon St. Kitts un Nevis uut truch britiske Siedlere kolonisierd. Do Siedlere bauden junner foar't eerste Tebak oun. Saint John’s wuude as eerste duurhoaftige europäiske Siedelenge apgjucht.

In't Jier 1680 geenen wiede Deele fon Barbuda in dän Besit fon ju Familie Codrington uur, ju hier ju ätter him benaamde Siedelenge as Ferwaltengs-Säntrum anlaide. Fieuw Jiere leeter wuuden ap do Ailounde Sukkerroor-Plontengen anlaid, wier grootstendeels afrikoanske Sklouen ap oarbaideden.

Teekenge fon dän Äntdäkker William Clark fon een Määlne ap Antigua (1823)

Admiroal Horatio Nelson baude in 1784 ap Antigua aan Kriechshoawen. Apgruunde fon dän stoarmseekeren Hoawen wuude English Harbour tou't Haud-Kwattier fon ju Flotte ap do Antillen uutbaud. Uumdät ju Flotte deer waas, wuuden do lääste Seeroowere ferdrieuwen. Ju Skloueräi wuude in 1834 ferbeeden, wiertruch do Plontengen hieren wirtskuppelken Gruundsleek ferloosen. So koom minner Jäild ap dät Ailound. In 1860 koom dät tou ju Fereenigenge fon Antigua un Barbuda, die Noome fon ju Kolonie waas deerbie bloot Antigua.

Unner ju Fierenge fon dän leeteren Premierminister Vere Cornwall Bird foarmde sik fon 1940 an een Uunouhongegaids-Bewäägenge. Al Säks Jiere leeter kreegen do Ailounde een oain Parlemänt. Antigua un Barbuda kreegen in 1956 dän Stoatus fon een oainstoundige Kolonie. Fon 1958 bit 1962 tou heerden do Ailounde tou ju Provinz fon ju Wäästindiske Föderatsjoon.

Do Ailounde trieden in 1967 dät Koppel fon do West Indies Associated States bie. Jo kreegen hiertruch ju fulstoundige binnepolitiske Autonomie, buutepolitiske Beloange wuuden fon't Fereende Köönichriek fersuurged. In'n Moai 1968 wuude die Stoat Lid fon ju Caribbean Free Trade Association (CARIFTA). Ju sänt Jierhunnerde dominierjende Sukkerroor-Wirtskup wuude in 1972 ienstoald. Ap dän 1. November 1981 kreegen do Ailounde ju Uunouhongegaid fon't Fereende Köönichriek unner dän näien Noome Antigua un Barbuda.