Barbuda
Barbuda is een Ailound fon do Litje Antillen in ju Karibik. Dät heert as Dependency tou dän Stoat Antigua un Barbuda. Barbuda lait sowät 40 km noudelk fon dät grattere Ailound Antigua. Dät häd hoast sowät 500 Ienwoonere (Stound 2018).
Geskichte
[Beoarbaidje | beoarbaidje Wältext]Dät roate al in't äddere 17. Jierhunnert Fersäike truch Änglound un Frankriek, dät Ailound tou besiedeljen, man dät slumpede nit. Tou läip waas ju Fersuurgenge mäd Woater, bietou koomen dät uungoadelke Klima un ju Betruuenge truch do Kariben. Eerste in 1666 kuuden do Ängloundere een fääste Kolonie gruundje. Do eerste Siedlere wieren do Bruure Christopher un John Codrington, ätter do ju Haudstääd fon dät Ailound benaamd is. Do Codringtons wieren in Foulge uk Sukker-Plonter ap Antigua, un loange Tied ju bestimmende Sibskup ap Barbuda.
Uum 1800 wuude dät Suudspit fon dät Ailound mäd aan Martello-Touden, aan britisken Fäästengstyp, seekerd, ju Ruine stoant bit däälich.
In 1981 wuude Barbuda mäd dät grattere Noaber-Ailound Antigua touhoope in ju Uunouhongegaid äntlät, wierbie een Moorhaid fon do Barbudioanere deerfoar stämd hiede, bie dät Fereende Köönichriek tou blieuwen.
Dät tän besiedelde Ailound mäd bloot n poor Täärpe hiede in 2011 sowät 1600 Ienwoonere.
In do äddere Mäidenuuren fon dän 6. September 2017 look die Hurrikan Irma in ju hoochste Kategorie 5 mäd sowät 300 km/h seküür uur Barbuda un fernäilde grääsich fuul. Do 1800 Ienwoonere wuuden ätter dän Stoarm twoangswiese ätter Antigua evakuierd, dät roate Begjuchte uut dän Häärst 2017, dät ju Zivilisation ap dät Ailound uutläsked waas. Man bit tou do meene Köäre ap dän 21. Meerte 2018 sunt wier sowät 500 Bewoonere in hiere oolde Huuse ap Barbuda touräächkeemen. Uum bie ju Köär deelnieme tou konnen, moasten jo mäd Feer, Fiskerboot of Fljooger ätter Antigua wai.