Amateurfunktjoonst

Uut Wikipedia
Wikselje tou: Navigation, Säike (08)
Ju 'Hutte' fon dät Amateur-Funkstation G0RTN, Betjooner Gerry Lynch, in London, 2005. Links sjucht me die IC7400 Seende-Ämpfanger mäd deerap n MFJ-949E Antennenoustimmer un dan gjuchts n Komputer.
Amateurfunk-Antennenanloage (Yagi-beam) an ju TU Bruunswiek
Ne QSL-Koarte
Ne uur QSL-Koarte

Geskichte[Beoarbaidje | Quelltext bearbeiten]

In n Ounfang fon dät Radio kuud älk noch moakje wät er wüül. Dät roate fluks Zivilljuude, do der fersoachten uur dät näie Medium sik enuur tou beloangjen. Dät annerde sik, as in dän eerste Waareldkriech die Wäid fon Radio as Kontaktmiddel hääruutkoom. Ätter dät bruukte me n Lizenz foar oaine Seendengen.

As dan die Rundfunk sik äntwikkelde, noom ju fluks do maast oainde Woogenlaangten (Loangwoogen/LW un Middelwoogen/MW) foar sik in Besleek. So wuuden do Funk-Amateure ferband ätter do Kuutwoogen (KW), un deer leeter uk wier ap gans smälle Frequenz-Beende.

Die uunwiese Mon[Beoarbaidje | Quelltext bearbeiten]

Nu is dät je so, dät ju Ferspreedenge ap LW un MW gungt mäd Boudemwoogen, dät sunt Woogen, do der mee beegje mäd dät Uurflak fon de Waareld. Ap bääste gungt dät ap LW, man ap MW wäd dät al ouswäkked uur laangere Oustande un ap KW is dät al gans läip.
Daach fersoachten do Amateure mäd hiere litje Fermuugen ap KW Kontakte uur laangere Oustande tou lääsen. Un wan do seekkundige Ljuude uk kwieden, dät et nit kuude, daach geenen do Amateurferbiendengen immer fääre.

In n Dezember 1921 wuuden do eerste transatlantiske Ferbiendengen moaked ap 230 Meter mäd n n Fermuugen fon 990 Watt. Leeter wuuden ap fuul kuutere Woogen Ferbiendengen laid mäd fuul litjere Fermuugen (< 50 Watt). So koom dät tou dän Spröäk fon do Funkamateure:

The wise men said it couldn't, but the unwise man he did it.
(Do wiese Ljuude kwieden, dät et nit kuude, man die uunwiese Mon, hie died et).

Eerste geen dät aal mäd Telegrafie, man leeter koom Telefonie bietou.

Roupteekene[Beoarbaidje | Quelltext bearbeiten]

Älke anärkaande Funkamateur kricht bie sien Lizenz n Roupteeken, wierbie do eerste Bouksteeuwen pro Lound ferskeeden sunt, t.B.

  • DA-DR Düütsklound - Biespil DL4KBS
  • G, GX Änglound - G0RTN
  • HZ Saudi Arabien - HZ1AB
  • K,W,N Fereende Stoate fon Amerikoa - W4PTS
  • ON-OT Belgien - ON4MU
  • PA-PI Niederlounde - PA0FBK
  • PP-PY Brasilien - PY2YP
  • VK Australien - VK4HF
  • VU Indien - VU3RSB

QSL-Koarten[Beoarbaidje | Quelltext bearbeiten]

Wan twäin Funk-Amateure (un dät rakt uk Wieuwljuude deerbie) toun eersten Moal Kontakt hääbe, dan seende jo sik enunner ne QSL*-Koarte, wierap jo uutfälle wan dät waas un wäkke Reewen un Antenne deerbie bruukt wuude (gjuchts Biespiele). An bestimde Tiede hoolde jo uk n Wädbewäärf (Contest) ou, wierfoar dan do Koarten as Bewies brukt wäide. Besunners interessant sunt Ferbiendengen uur groote Oustande (DX), bietiede mäd Hälpe fon Reflektione juun de Moune, juun Meteorite, of juun Satellite. *Dat QSL heert tou ju Q-Kode fon do Amateure.

Ferbiendengen ätter buuten[Beoarbaidje | Quelltext bearbeiten]