Stellingwerfsk

Dät Stellingwerfske (Stellingwarfs, wäästfräisk uk Oertsjongersk naamd) is n läichsaksisken Dialekt, die der boald wäd in dän grootste Deel fon do Meenten Aast- un Weststellingwerf (touhoope do Stellingwerve), Steenwijkerlound un n litjen anlääsendenden Deel fon Drenthe. Uutnoamen sunt do Täärpe Haulerwijk un Waskemeer (bee Ooststellingwerf), wier Wäästfräisk boald wäd, un dät Gestrich uum dät Täärp Noordwolde tou, wier sik unner Ienfloud fon do Feenkolonie ne oaine Sproake äntwikkeld häd. Do Stellingwerve sunt n Gebiet in Wäästfräislound wier siet oolden Tieden neen Fräisk boald wäd. Dät Skeed twiske Stellingwerfsk un Fräisk Gebiet wäd markierd fon ju Äi die Kuunder [küünder], die der ap Wäästfräisk Tsjonger hat. Die wäästfräiske Noome Uurtsjongersk foar dät Stellingwerfske kumt deerhäär.

Stellingwerfske Bouke

Ju Biebeluursättenge in dät Stellingwerfske waas ap n 12. Moai 2010 ärskienen.^[1]

Dät Stellingwerfsk Woudebouk (Stellingwerfsk-Niederloundsk) bestoant uut fjauer Beende mäd uungefeer 70.000 bit 80.000 Woude.
2005 ärskeenen n Hondwoudebouk Stellingwerfsk-Niederloundsk un ne Woudelieste Niederloundsk-Stellingwerfsk.

N gjucht bekoanden Dialektskrieuwer is Johan Veenstra. Hie häd Bouke in dät Stellingwerfske skrieuwen un sien maast ferkoopede Bouk Een brogge van glas is in dät Wäästfräiske uursät wuuden.

Stellingwerfsken Pop-Soang

Do lääste Jiere häd sik Pop-Soang in dät Stellingwerfske äntwikkeld. Dät lapt ju fon tradionelle Donsmusik as

De Muiters

bit Soang mäd n Striek-Ensemble as fon

Carolien Hunneman

Spreekerantaal

Skild bie ne Kuunderbrääch mäd Text: *Jie passierje n Sproakeskeed*.
Links unner stounde Woude in Stellingwerfsk, Wäästfräisk un Niederloundisk.

Wofuul Stellingwerfsk, Wäästfräisk un Niederloundisk in do bee Meenten boald wäide, is unnersoacht wuuden in n Quick-Scan fon ju Provinz Fryslân in do Jiere 2007 un 2011. Do Resultoate sunt so:

Resultoate Quick-Scan 2007
Huussproake	Waäststellingwerf	Aaststellingwerf
Stellingwerfsk	29%	12%
Fräisk	18%	41%
Niederloundisk	53%	47%

Resultoate Quick-Scan 2011
Huussproake	Waäststellingwerf	Aaststellingwerf
Stellingwerfsk	22%	11%
Fräisk	22%	39%
Niederloundisk	56%	50%

Minner as 5 % fon dät Jungfoulk boalt Stellingwerfsk.

Sjuch uk

Dialekte in Fryslân

Externe Ferbiendengen

Wällen, Anmäärkengen un Ätterwiesengen

Wällen, Anmäärkengen un Ätterwiesengen:

↑ Websiede Ensafuorthinne uur ju stellingwerver Biebel

Sproaken un Dialekte in ju Provinz Fryslân (do Niederlounde)

[1] Websiede Ensafuorthinne uur ju stellingwerver Biebel

[1]