Sköäweljen

Uut Wikipedia
Sköäwele, so as do fröier bruukt wuuden un do der mäd Beende unner do Skoue buunen wuuden.

Sköäweljen (dt. Schlittschuh laufen, eng. to skate, fra. patiner, nl. schaatsen, nfr. schure, wfr. reedride) is sik uur dät Ies foutbewäägje ap n Oard Gliedstukke, do Sköäwele.

Sköäweljen fröier in Seelterlound[Beoarbaidje | beoarbaidje Wältext]

Fröier wieren do Nieden in Seelterlound in de Winter unner Woater, un wan et dan froos, dan roate et groote Flächen mäd Sköäwelies. Oold un jung un ju ganse Skouljuugend wieren ap de Sköäwele. Dät waas n Fergnöigen, Roupen un Sjungen, so loange jo sjo kuuden. Bie Mounskien wuud et leet bit älk fergnöigd un wuurich ätter Huus geen. So geen dät alle Deege so loange dät Ies noch heelt. Älk kuud sköäwelje. Litje Bäidene leerden dät bääte n Stoul. Älk moaste sköäweljen leere. Do nit wüülen, wuuden fon do Oolden twongen, dan do nit sköäwelje kuuden, goolten as Sunnerlinge.

Frachtferkier truch Sköäweler[Beoarbaidje | beoarbaidje Wältext]

Domoals roate et uk noch strommere Wintere as nu. Do bääste Sköäweler moakeden Tuuren ap de Seelter Äi un ju Leda ätter Lier un hoalden deer Weere häär. So wäd noch fertäld fon Oaltje Beernd. Hie waas an t Broodboaken un hied do Broode al kloor foarmd, as Antje him fertälde, dät jo goarneen Soalt moor bie do Koopljuude kriege kuuden un wüülen uutenemäiden sloachtje. ,,Dan stik dät Fjuur in de Ougend man oun, ik wol ieuwen Soalt hoalje fon Lier." As Antje dät Fjuur ounstikt, bint Beernd do Sköäwele unner, un as dät Fjuur ferbaadend waas, do waas Beernd deer in Hollen al wier fon Lier, mäd trüütich Puund Soalt ap de Skullere. Antje hied juust dät Fjuur uut de Ougend leeken un Beernd kuud dät Brood ounskuuwe. So geenen in loange stromme Wintere eenige Artikkele tou Eende, do uurs mäd et Skip fon de Stääd hoald wuuden. Reede wieren noch uunbekoand. So kon man sik foarstaale, wo die lichte Frachtferkier fon kräftige Sköäweler besuurged wuude. Ls51.