Rio Purus

Uut Wikipedia
Koarte fon't Amazonas-System, die Purus is faawelk besunners känteekend

Die 3210 Kilomeetere loange Rio Purus (portugiesiske Skrieuwwiese; ap Spoansk: Río Purús) is een Äi, ju fon gjuchts in dän Amazonas fljut.

Ferloop fon ju Äi[Beoarbaidje | beoarbaidje Wältext]

Ju Äi äntstoant in een Region mäd middelhooge Bierge aastelk fon do peruoanske Anden uut dät Touhoopefljooten fon Río Curiuja un Río Cujar in ju Sierra de Contamana. Do Wällen fon düsse Wäl-Äien befiende sik in ju peruoanske Region Ucayali, sowät 320 Kilomeetere noudelk fon Cuzco. Fon junner fljut die Purus in noud-aastelke Gjuchte ätter Brasilien wai, wier hie in aan slingenrieken Ferloop un sunner grooten Hööchte-Unnerskeed ap dän Amazonas tou fljut. Sien Mundenge lait sowät 150 km wäästelk fon ju Grootstääd Manaus.

Orografisk is die Purus dän Rio Madeira gjucht äänelk. Hie fljut sowät 200 Kilomeetere wäästelk grootstendeels parallel deertou un häd bienaist ju sälge Loangte. Sin Ferloop foulged moor of minner ju Luchtlinje twiske do Amazonas-Wällen fon dän Ucayali un dät Säntrum fon't Amazonas-Bäkken bie Manaus. Ju Luchtlinie fon sien Wälle bit tou ju Mundenge is bloot 1450 Kilomeetere loang, bie Ienreekenge fon aal sien Slingen wäd sien loangte ap 3200 Kilomeetere taksierd. Dät Rebät, wier hie sien Woater fon lukt, häd een Flakte fon sowät 371042 Quadroatkilomeetere. Sien Mundenge lait in dän brasilioansken Buundesstoat Amazonas. Die Purus drächt mäd een Woaterfierenge fon 11.000 m³/s wät moor as fieuw Prosänt fon dät Woater bie, dät uur dän Amazonas ätter'n Atlantik oulopt.

Loangs do Ougere rakt dät sowät 40.000 km² Loundskup, ju bie Hoochwoater unner Woater stoant; (Várzea) buppedät bilgje sik uut outrände Slingen fon ju Äi masse stoundende Woaterdoaben. Düsse bee Faktoren fiere deertou, dät die Purus foar ju Fiskeräi uuremäite produktiv is un dän grootsten Deel fon ju Fisk-Fersuurgenge foar ju Grootstääd Manaus seekerstoalt.

Die Purus is uur dän grootsten Deel fon sien Loangte goadelk foar ju Skipfoart; uur dän Rio Acre, een fon sien Sieden-Äien, kumt me mäd't Skip bit ätter Bolivien wai.