Techniske Mechanik

Ju Techniske Mechanik is aan Deel fon ju Mechanik. Ju bruukt do physikoalske Gruundlääsen foar techniske Systeme un behonnelt foar aaln do fääste Köärpere, do in ju Technik wichtich sunt. Wier ju ap uut is, is foaraaln ju Bereekenge fon do Krääfte, do in do Köärpere wierkje. Foarleesengen in techniske Mechanik sunt fäästen Bestounddeel in do Studiengonge fon dän Maskienenbau un dät Bauingenieursweesen. Buppedät wäd ju in noch moor Ingenieurswietenskuppe behonneld, t.B. in ju Elektrotechnik, dät Industriedesign of dät Wirtskupsingenieursweesen, man deer is dät fon wät litjere Betjuudenge.

Ju Techniske Mechanik skäl do theoretiske Bereekengs-Ferfoaren reeke, do biespilswiese in dän Maskienenbau un ju Baustatik bruukt wäide. Ju oaintelke Bemeetenge Baudeele of Dreegwierke, ju Uutwoal fon do Wierkstoffe un aal sowät wäd dan fon uur Disziplinen uurnuumen, do wät naier bie'e Praxis stounde, biespilswiese ju Konstruktsjoonsleere of ju Bedrieuwsfäästegaid. Deerbie is ju Techniske Mechanik dan een Hälpswietenskup.

Wier dät in ju Techniske Mechanik uum gungt:

Do Sätgjuchte fon ju klassiske Mechanik,
mathematiske Modelle fon do mechaniske Touhoopehonge fon physiske Köärpere,
spezifiske un ratsjoonelle Methoden fon ju bereekenjende Analyse fon mechaniske Systeme.

Klassisk wäd ju Techniske Mechanik iendeeld in:

ju Statik, ju sik mäd Krääfte ap rauende (uunbewäägede) Köärpere (haudseekelk mäd eendimensionoale Steeuwe) befoatet
ju Fäästegaidsleere, ju sik mäd deformierbeere Köärpere (blw. haudseekelk mäd Twäärssniede) befoated un Materioal- un Twäärssnied-Oainskuppe integriert,
ju Dynamik mäd do bee Deelrebätte Kinetik un Kinematik, do sik mäd bewäägede Köärpere befoatje.

In ju Physik wäd deerjuun ju Mechanik in ju Kinematik un ju Dynamik iendeeld, ju junner ju Statik un ju Kinetik änthoaldt.

In ju Theoretiske Mechanik (uk Analytiske Mechanik naamd) gungt dät man deeruum, fon Axiome as do Newtonske Sätgjuchte uutgunged een juunspröäksfräie mathematiske Theorie tou äntwikkeljen. In ju Techniske Mechanik wäd deerjuun aan methodisken Apbau wääld, die do bruukte Kannenskuppe foar ju Bereekenge fon Maskienen of Bauwierke fermiddelt.

Sjuch uk

Wällen

Düsse Siede is grootstendeels uursät ätter ju düütsksproakige Wikipedia.