Marka
Ju Marka is ju 28,7 km loange, suudaastelke un orographisk gjuchte Siepe fon ju Seelter Äi. Ju fljut in do läichsaksiske Loundkringe Oamselound un Kloppenbuurich.
Geographie[Beoarbaidje | beoarbaidje Wältext]
Ferloop[Beoarbaidje | beoarbaidje Wältext]
Ju Marka äntspringt in dät Skeedgebiet fon do Loundkringe Oamselound un Kloppenbuurich. Hieren Uursproang lait ap dät Hase-Leda-Woaterskeed twiske dät Käädentäärp fon Lindern in dät Suudaaste un dät Linderner Täärp Neuenkämpen in dät Aastsuudaaste (Loundkring Kloppenbuurich), dät Wäidelter Täärp Bokholte in dät Wäästnoudwääste un dät Käädentäärp fon Wräis in dät Noudnoudaaste (Loundkring Oamselound). Hie fint sik an dän Suudaastraant fon dät maastendeels as Natuurskutsgebiet Bokholter Touse uutwiesde Tousenfoan – twiske do Hööchten Holthöhe (44 m)[1] in dät Suudsuudaaste un Foarel (39 m)[1] in dät Noude.
Ju Marka lapt eerste in noudaastelke Gjuchte. Deerbie gungt an Wräis foarbie in dät Wääste un an Peheim in dät Aaste, do der bee n Aantje fon ju Marka oawe lääse. Dan gungt ju wäästeelk an ju Molbiergener Buurskup Biskopsbrääch un an ju Aiter Buurskup Näimäärkhuusen. Fääre woant ju sik ätter dät Noude un lapt an dät aastelke Määrkhuusen, an dät wäästelke Näiwräis in dät Aaste un an dät aastelke Ällerbrouk foarbie. Ätter Passierjen fon dät aastelke Barkentange un dät wäästelke Heedbierich knikt ju ätter dät Wääste ou un slacht deerbie ne Linksbooge uum dät fääre fon dät Woater lääsende Näiskäddel.
Toulääst fereend sik ju Marka eenige Meeter suudelk fon dät ap dät Skeed fon Ait tou Seelterlound ferloopende Kustenkanoal, twiske Näiskäddel in dät Suudsuudaaste un Seedelsbierich in dät Noude, mäd ju Oaje tou ju Seelter Äi, ju linke Siepe fon ju Leda.
Hase-Leda-Woaterskeed[Beoarbaidje | beoarbaidje Wältext]
Dät Wällegebiet fon ju Marka lait ap dät Hase-Leda-Woaterskeed: Fon ju Wälle fon ju Marka tou dän wälnaien Buppeloop fon ju noudnoudwäästelk äntspringende Middelradde bestoant ne kunstelk moakede un dän Tousenfoan äntwoaterjende Kanoalferbiendenge, ju uut dät Marka-Wällekanoal hääruut lapt. Ätter dissen Kanoal loope noch in dät Wällegebiet un wällenaien Buppeloop fon ju Marka moorere litje Sloote, deerunner die fon Wräis kuumende Vreeser Graben. Wült ju Middelradde, ju der noudelk buppe dän Tousenfoan äntspringt, in uurweegend suudwäästelke Gjuchte ap ju Hase toulapt, lapt dät Woater fon ju Marka in maast noudelke Gjuchte ju Seelter Äi un dan ju Leda tou; Hase un Leda sunt direkte Oamse-Touflusse.
Literatuur[Beoarbaidje | beoarbaidje Wältext]
- Rainer Hausfeld: Das Markatal, eines der letzten naturnah erhaltenen Bachtäler Nordwestdeutschlands. In: Jahrbuch für das Oldenburger Münsterland 1984. Vechta 1983, S. 184–207