Mjoon

As Mjoon biteekent me dät massenhoafte Ousnieden Plonten as Gäärs ap ne Mäid of Koarel ap n Äkker. Dät wude aleer mäd Reewen as t.B. een Saise däin, däälich dwo dät do maaste Ljuude oaber mäd Maskienen fonne Motorsaise bit tou dän Mjotäärsker, die deerbie uk noch täärske kon. Foar do Seelter waas dät Gäärsmjoon bit sowät 1900 een wichtige Iennoamewälle, jo sunt dan as "Holloundsgungere" ätter Wäästfräislound wai geen un häbe deer as Mäddere Jäild fertjoond.

• 
  Saise
• 
  Oolde Mjomaskiene
• 
  Motorsaise
• 
  Mjotäärsker

Mjoon inne oolde Buuräi

Algemeen kon me kweede, dät me nit fluks ätter dän Rien mjo skäl, dan is dät aal tou wäit un wol nit gjucht druugje. Dät kon me bloot moakje, wan me't Gäärs nit bruukt un ferrootje lät, dät rakt dät je uk mongs. Of wan me dät Gäärs fluks ferfodderje wol, dan is dät uk egoal af druuch af wäit is.

Gäärs wäd in ju oolde Buuräi mäd ju Saise oumäind un ap Wiersene, dät sunt litje Waale, apsmieten. Do Wiersene wäide dan oafter wier uumelaid un näi apsmieten, deermäd älk Spier moal an ju Luft kuume kon un dät goud druuget. Wan't aal druuch is, wäd dät Hoo bälted un bie Geläägenhaid oufierd.

Mäd Koarel waas dät fonsäärm n bitje uurs. Dät Koarel is je al täämelk druuch, wan't oumäind wäd. Ätters mout me dät touhoopegrappe un tou Jieuwen biende. Do wäide dan waifläid, do wäide ap een bistimde Wiese touhoopestaald, un wät deerbie ruutkumt, dät sunt Hokken. Dät tjoont deertou, dät dät lääste bitje Fuchtigaid deer ruut gungt, wan die Wiend truchgungt, un it tjoont uk deertou, dät me nit älke Jieuwe oakeld iensammelje mout, wan me do inne Skäin fiere wol.

Foar't Waifläien rakt dät in älke Region Gebruuke, wo dät däin wäd, un dät skäl aleer foarkeemen weese, dät Buuren fon buute ätter Seelterlound kuume, un kweede, dät do dät deer aal ferkierd moakeden.