Mjotäärsker

Dissen Artikkel stoant in dät Wikipedia-Review.

Droon video fon n mjotäärsker 2022

Truchsnit Mjotäärsker: 1=Haspel, 2=Soaksboolke, 3=Ienluuksnigge, 4=Skeeuwföärderer, 5=Steenfanger, 6=Täärsktrummel, 7=Täärskkuurich, 8=Lattenskädder, 9=Stappenboudem, 10=Bloaser, 11=Buppesieuwe, 12=Unnersieuwe, 13= Uurkiersnigge, 14=Uurkier, 15=Koarelsnigge, 16 Koareltank, 17 Sträihäksler, 18=Foarerkabine, 19=Motor

N Mjotäärsker is ne sälwen fierende Maskine, ju der ferwoand wäd tou dät Aadenjen fon Koarelfruchte, Räiwsäid, Sunnenbloumen, Äkkerboonen un Gäärssäid.

Ju Maskine is uutrusted mäd n Soaksboolke, Sniededisk, Haspel, Ienluuksnigge, Täärsktrummel un Sieuwen. Deertruch wäd in aan Oarbaidsgong dät Gewoaks mäind, toarsken un wäd dät Säid skeeniged. Ouhongich fon do tou aadenjene Fruchte wäd n Mjofoarsats, die der bestoant uut Mjoboolke, Sniededisk un Haspel an ju Maskine koppeld.

Do eerste moderne Mjotäärskere uut do füüftiger Jiere fon dät 20. Jierhunnert hieden n Dieselmotor un wuuden fon n Traktor leeken.

Mjo

Ju Mjobratte kon lääse twiske 3 un uur 10 Meter. Ju Frucht wäd n Aantje buppe de Gruunde oumäind, wiertruch n Eende fon dän Stängel (ju Stoppel) stounde blift. Dät Gewoaks faalt ätter dät Mjoon ap dän Sniededisk un wäd fon dän rundtraalende Haspel un dän Ienluuksnigge in dän Täärsktrummel ounfierd.

Täärske

Die Gewoaksstroom wäd twiske dän Täärsktrummel un dän Moantel fierd, wier truch Wrieuwenge dät Säid (do eenpelde Koarele) fon dät Sträi skat wäd. Ätters kumt dät Sträi ap do Skäddere un do mäd dät Sträi noch meefierde Koarele faale truch Goate ätter unneren ap ju buppeste Sieuwe.

Skeenigenge

Dät Säid uut dän Täärsktrummel faalt ap ju buppeste Sieuwe. Unner disse Sieuwe sit noch een. Ju buppeste Sieuwe häd grattere Goate as ju unnerste Sieuwe. Truch n Bloaser wäd n Luftstroom truch do Sieuwen drieuwen en deertruch faale bloot do swarrere Paate (dät Säid) truch do Sieuwen. Uut dän Skeenigengsprotsäs kuume träi Produktstroome:

Sääf

Aal wät ap ju buppeste Sieuwe lääse blift, bestoant uut Sääf (loose Skielen un Ongen) un loose Ieren. Dät faalt ap dän Gruund tourääch.

Touräächstroom

Aal wät ap ju unnerste Sieuwe lääse blift, sunt hoolich of nit toarskene Ieren un Koarele, do der noch an dät Sääf klieuwje. Dät wäd fon näien ätter dän Täärsktrummel transportierd un noch moal toarsken.

Produkt

Aal wät truch ju unnerste Sieuwe faalt, is skeen Säid, dät ätter dän Koareltank transportierd wäd.

Ienstaalenge

Foar n goud Resultoat mout ju Gauegaid fon dän Luftstroom truch do Sieuwen goud oustoald wäide. Is ju tou läich, dan gunge mäd dät Säid uk litje Stukke Sträi mee. Is ju tou groot, dän wäd dät Säid uk toun Deel wächbloased. Ju Gauegaid wäd räägeld truch ju Traaltaal fon dän Bloaser. Ouhongich fon ju tou aadenjene Frucht wäide uk unnerskeedene Sieuwen ferwoand, man moderne Mjotäärskere sunt oafte uutrusted mäd ferstaalboare Sieuwen.

Säidleegerenge

Dät Säid wäd ätter dän Koareltank transportierd un wan die ful is, wäd hie truch n Outankroor ap n Anhonger äntleeden. Moderne Mjotäärskere konnen bit sowät oachte Tunnen Koarel in dän Tank leegerje.

Ougefal-Feroarbaidenge

Dät Sträi kon in n Määd bääte dän Mjotäärsker ap de Gruund deellaid wäide. Ap wäkke Mjotäärskere is dät uk muugelk, dät Sträi mäd n Häksler tou ferkleenerjen un uur dät Lound tou ferspreeden. In wäkke Falle wäd dät Sääf mäd Skieuwen fersprat.

Andrieuwenge

Die Mjotäärsker wäd andrieuwen mäd n Dieselmotor. Do ferwoande Laistengen lääse twiske 100 un 400 kW. Ju Andrieuwenge fon do Täärskmechanike geböärt bolde altied uur Kielgjoomen. Ju Andrieuwenge fon do Joole geböärt mechanisk of hydraulisk.

Ferbiendengen ätter buuten

 Commons: Combine harvester – Mediendoatäie

• Oubieldenge Truchsnit Mjotäärsker
• Oubieldenge Täärsktrummel