Buutenäidsk Lieuwend

Uut Wikipedia
Die Arecibo Ättergjucht is n digitoalen Ättergjucht soand tou dän groote Kugelstiernhoop Herkulus (ap 25.100 Luchtjiere fon de Sunne), un is n bekoand Symbol fon moanskelke Fersäike uum buutenäidsk Kontakt tou kriegen. (Ju Oantwoud kumt uur 50.200 Jiere!)

Buutenäidsk Lieuwend is Lieuwend dät nit fon ju Planet Äide is. Dät is nit bekoand, af dät ainewaine buutenäidsk Lieuwend rakt. Dät rakt naan Bewies, dät et existiert, man et wäd ounnuumen, dät n grooten Prozentsats fon do Ljuude deeran leeuwe.

Do maaste Wietenskuppere leeuwe, dät, wan buutenäidsk Lieuwend existiert, sien Evolution an ferskeedene Steeden in dät Al passierd is. Uur leeuwe, dät dät Lieuwend begon ap ne litje Taal fon Planeten un sik ätter uur Planeten fersprat häd. Me skäl deerbie oawers betoanke, dät dät in ju Waareldruumte twiske do Planeten döödelke Stroalenge as UV rakt. Daach änthaalt ju Ruumte twiske do Stierne in Stoafwulken al touhoopestoalde Molekülen do der as Bausteene foar dät Lieuwend tjoonje konnen.


Ne Bereekenge[Beoarbaidje | beoarbaidje Wältext]

Ätter Asimov rakt dät in uus Molksträitesystem bie do 300 Milliarden Stierne man sun 650 Millionen bewoonboare Planete. Dät kumt deerhäär, dät nit aal Stierne (as toun Biespil do roode Hüünen) ne goude Stroalenge reeke un bie Dubbelstierne annerje sik do Uumstande toufuul. Deertou kumt, dät do Stierne in de Midde fon dät System goarneen Planete hääbe. Uk skällen sukke Planete in ju bewoonboare Zone af Ökosphäre fon dän Stiern lääse, also nit tou koold weese (as Mars) af nit tou heet (as Venus). Sogoar uus Äide häd heete un koolde Tieden (Iestiedoaler) koand. Deertou skäl sun Planet nit tou licht weese, uurs kon hie ju Atmosphäre nit fäästhoolde, as uus Moune. Ätter Asimov behärbiergje dan 390 Millionen Planete in de Molksträite ne technologiske Zivilisation, aal ätter ne bestimde Theorie fon dät Äntstounden fon dät Lieuwend.

Ättergjuchte?[Beoarbaidje | beoarbaidje Wältext]

Interessant is dan ju Froage, wieruum wie noch sieläärge niks fon uur bewoonde Planeten heerd hääbe. Deerbie mouten wie betoanke, dät dät sik uum gjucht groote Oustande honnelt; die naiste Stiern, Proxima Centauri stoant ap 4,3 Luchtjiere fon hier (ne Raketenraise fon 63.000 Jiere bie 20km/sek!), soodät me ap ne Funkbosskup eerste in 8,6 Jiere n Oantwoud kriege kon.

Ätter wäkkene kon sik daach uk Lieuwend äntwikkeld hääbe ap do Planete Venus un Mars un ap ju Jupitermoune Europa un do Saturnmounen Titan un Enceladus. Man fon do hieden wie dan al eer wät heere moast.

Buutenäidske Lieuwendsfoarme wäide oafte in ju Foulkskultuur as Buutenäidske (ET’s) un bietiede uk as Marsljuude beteekend.

Sjuch uk[Beoarbaidje | beoarbaidje Wältext]

Literatuur[Beoarbaidje | beoarbaidje Wältext]