Bierich-Kat

Uut Wikipedia
Bierich-Kat
Aan Bierich-Kat (Leopardus jacobita)
Aan Bierich-Kat (Leopardus jacobita)
Systematik
Oardenge: Roowdierte (Carnivora)
Uurfamilie: Katteoardige (Feloidea)
Familie: Katte (Felidae)
Unnerfamilie: Litje Katte (Felinae)
Sleek: Pardelkatte (Leopardus)
Oard: Bierich-Kat (Leopardus jacobita)
Beskrieuwen fon CORNALIA, 1865

Die Bierich-Kat of Anden-Kat (Leopardus jacobita, Syn.: Oreailurus jacobita) is een suudamerikoanske Oard binne ju Familie fon do Katte. Die Bierich-Kat is tou fienden in dät Rebät fon do Anden in Suud-Amerikoa un wäd ap ju Roode Lieste fon säildene Oarde fon ju Waareldnatuurskuts-Organisatsjoon (IUCN) as "stäärk in Gefoar" (Endaraged) liested, uumdät ju heele Populatsjoon ap minner as 2500 uutwoaksene Dierte taksierd wäd, bie aan ouniemenden Populatsjoons-Trend. Dät rakt noch nit fuul wietenskuppelke Doaten uur ju Oard. Do eerste Film-Apnoamen fon ju Oard äntstuuden eerste ätter 2000 truch Christian Baumeister.

Määrkmoale[Beoarbaidje | beoarbaidje Wältext]

Die Bierich-Kat is gratter as die Chileenske Woold-Kat un die Pampas-Kat. Dät fon Cornalia in 1865 beskrieuwene Exemploar waas 35 cm groot bie een Kop-Rump-Loangte fon 60 cm un een Stäitloangte fon 43 cm. Sien loang, wook, ticht Fäl is ljoacht gries plakked mäd swottelke of bruunelke Loangsstriepele, oun dän Buuk wiet mäd njuugen swottelke of bruunelke Ringe uum dän Stäit un een ljoacht Eende. Dät Fäl is ap dän Rääch 40 mm loang, oun dän tuustergen Stäit 35 mm. Ätter Reginald Innes Pockock läite sien loange Fälhiere toanke, dät die Bierich-Kat sien Lieuwend in koolde, fälserge Habitoate toubrangt.

Die Bierich-Kat is moor of minner so groot as n grooten Huus-Kat mäd een Kop-Rump-Loangte fon 70 cm. Ju häd een Wächte fon 4-7 kg.

Die Bierich-Kat lät so äänelk as aan Pampas-Kat, die in dät sälge Rebät lieuwt. Do niepe Unnerskeede mouten immer noch fon ju Foarskenge behonneld wäide, uumdät dät in do Museen nit fuul Exemploare rakt, do foar ju Unnersäikenge tou Ferföigenge stounde.

Wier die Bierich-Kat tou fienden is[Beoarbaidje | beoarbaidje Wältext]

Dät Ferspreedengs-Rebät fon dän Bierich-Kat is in gräin deerstoald

Die Bierich-Kat is die säildenste Kat fon Suud-Amerikoa un häd sien Heemad in do hooge Anden fon't suudelke Peru uur dät Suudwääste fon Bolivien, dät Noudaaste fon Chile un dät Noude fon Argentinien. Sien Habitoat lait in do fälserge, boomloose Rebätte fon do Anden buppe do 3000 Meetere uur ju See. Junner rakt dät een koold, ruuch, druuch Klima: Do Temperatuuren gunge deeges uum do 0 °C un minner. Twäin Bierich-Katte wuuden in't Jier 2004 in ju argentienske Provinz Mendoza in't stäppenoardige Busklound fon Monte in#t Noude fon Patagonien mäd Hälpe fon een Kamerafalle ap een Hachte fon 1800 m apnuumen. Dät Ferspreedengs-Rebät gungt sowät 500 km fääre suudelk as toufoarne toacht wuude. Moor Unnersäikengen läite ounniemen, dät Bierich-Katte in do suudelke Foarbierge fon do Anden un in ju patagoonske Stäppe tichtebie deel bit ap een Hachte fon 650 Meetere foarkuume un do Viscachas foulgje, do do foaraaln joagje.