Anden-Boare

Uut Wikipedia
Anden-Boare
Anden-Boare (Tremarctos ornatus) in aan Zoo
Aan Anden-Boare (Tremarctos ornatus) in aan Zoo
Systematik
Oardenge: Roowdierte (Carnivora)
Uurfamilie: Huundeoardige (Canoidea)
Familie: Boaren (Ursidae)
Unnerfamilie: Kuutsnuuten-Boaren (Tremarctinae)
Sleek: Tremarctos
Oard: Anden-Boare (Tremarctos ornatus)
Beskrieuwen fon CUVIER, 1825

Die Anden-Boare of Bril-Boare is ju eensige Boaren-Oard, ju däälich in Suud-Amerikoa tou fienden is, un uk ju eensige Oard fon do Kuutsnuuten-Boaren, ju dät bit däälich rakt.

Anden-Boaren lieuwje in do tropiske Anden un foarleegerde Bierichloundskuppe in Kolumbien, dät wäästelke Venezuela, Ecuador, Peru un Bolivien. So sunt Allesfreetere, man jo freete foar't maaste Plonten-Materioal, foaraaln Drieuwe un Fruchte fon Bromelien-Plonten un Kakteen. Säildener fange jo uk Gnauedierte, Insekten, Sniggen, Fuugele un juust so uk grattere Suugedierte, biespilswiese Harte, Bierich-Tapire un uunbewoakede Huusbäiste. Do Boaren lieuwje maast oankeld un fiende sik bloot tou ju Poorengstied as Poor touhoope. Do Wiefkene brange do Litje aleenich tou Waareld un betjoue jo bit tou two Jiere.