Moddere

Uut Wikipedia
Wikselje tou: Navigation, Säike (08)
Moddere
Vormela peregusna
Vormela peregusna uut Deele fon Asien
Systematik
Unnerklasse: Eutheria (normoale Suugedierte,
juunuur Püüt-Dierte un Uursuugedierte)
Uuroardenge: Laurasiatheria
Oardenge: Roowdierte (Carnivora)
Uurfamilie: Canoidea
Familie: Moddere (Mustelidae)

Do Moddere (Mustelidae) sunt ne Familie fon do Roowdierte (Carnivora). Wan me bloot do rezente Taxa beoachtet, rakt dät (do Stjunkdierte, do ätter ne genetiske Unnersäikenge ne oaine Familie sunt, meetäld) 6 Unnerfamilien, 25 Sleeke un 67 Oarden in disse Familie. Wät me so normoal unner "Modder" ferstoant, sunt Oarden as die Boommodder (Martes martes), die Steenmodder (Martes foina), die Ulk (Mustela putorius) af dät Wieselke (Mustela nivalis). Man die Taks (Meles meles) un die Fiskotter heere ook dertou.

Geskichte[Beoarbaidje | Quelltext bearbeiten]

Ne sowät 12 Milione Jiere oolde Buppekeeuwe fon ju Modder-Oard Sthenicitis campestris

Moddere rakt dät sänt dät Eozän, dät der foar 55,8 Millione Jiere begon un foar 33,9 M. foarbie waas. Doomoals wieren jo bloot in Europa, man as in dät Oligozän (dät der foar 33,9 Millione Jiere begon un foar 23,03 M. Jiere foarbie waas) Europa un Asien sik truch geografiske Ferannerengen (as ju Waarelddeeldrift un foarallen Ferannerengen fon dän Meeresspeegel) ferkoppelden, koomen jo ook ätter Asien un Noudamerikoa. In dät Pliozän (foar 1,8 bit 5,3 Milione Jiere, as uus Foaroolden uut dän Sleek Australopithecus so uutseegen) koomen do Moddere ätter Afrikoa. In dät leete Pliozän, as ju Loundbrääch fon Panama Noud- un Suudamerikoa ferboont, koomen jo ook ätter Suudamerikoa. Hier is nu ne Koarte. Europa, as et in dät Eozän uutsaach, is jeel un häd n A. In dät Europa fon dät Eozän lieuweden do eerste Moddere. Do swotte Piele wiese, wo do Moddere sik in dät Oligozän uutbratten, die ljoacht-blaue Piel, wo in dät Pliozän, un die dunkerblaue Piel, wo in dät leete Pliozän. Die Lieuwendsruum fon do Moddere däälich is gäärsgräin, un dät jeele Gebiet heert (buute do Gebiete wier dälich Meer is) ook noch dertou. N B betjut, dät deer gans seeker ne Lound-Brääch waas, of wan dät n B* is, dät der immer noch een is.

Mustelidae geology.svg