Wälp

Wälp
N Wälp (Numenius arquata) in Änglound
Systematik
Oardenge: Wälpoardige (Charadriiformes) Familie: Snippenfuugele (Scolopacidae) Sleek: Numenius Oard: Wälp (Numenius arquata)

Die Wälp of Wülp (Numenius arquata, de. Großer Brachvogel) is n Fuugel uut ju Familie fon do Snippenfuugele. Hie lieuwet in Aast-Middel-Europa, Aasteuropa un Änglound. In dät Noudwääste gungt sin Liewendsruum bit tou Noudwääst-Frankriek. Moonige Wälpe luuke in dän Winter tou do Foaralpenseen, man eenige blieuwe uk in hiere Broudgebiet. Die Wälp rapt normoal "tlüü tlüü tlüü", wät gans as ne Flöitepiepe klingt.

Kost

Die Wälp frät ferskeedene litje Dierte do hie uut dän Gruund pluudert, besunners Äisen, man in dät Wääd uk Musselken un litje Krääpse. Säilden frät hie uk Bäien un litje Plonten.

Gebiet-Ferdäägenenge un Wuut

Wan n monnelken Wälp sin Gebiet ferdäägent, fljucht hie hääruume. Dät sjucht so uut: Hie sticht stum an, un dann glit hie wier n bitje deel un rapt deerbie uk wier as ne Flöite, man djapper as normoal. Ätter dissen Roup moaket hie n "trrrrrr". Wan me him äärgert af hie sik sonst apiewert, moaket hie "tüi-tüi-tüi-tüi".

Broud

Oaiere fon dän Wälp

In ju Tied fon ju Foutplontenge rapt die Wälp n anstiegend: "tlüütlüütlüütlüütlüürrrrrrrrr". Hie lait sin gräinske tou bruunske, dunker sprinkelge Oaiere (67 x 46 mm) in dän April of in dän Moai in ne litje Molle, ju hie as Nääst skrabbed un wooked hied. Allebee Oolden broude do Oaiere in fjauer Wieke uut. Deerätter slippe do litje Wälpe. Fieuw Wieke leeter konnen se fljooge.

Literatuur

• Michael Lohmann:BLV-Bestimmungsbuch Vögel ISBN 3-8289-1668-6
• Eckard Pott un Jean C. Roché: Wer singt denn da? Weltbild-Ferlaach ISBN 978-3-8289-3443-6