See-Leeguoan

Uut Wikipedia
See-Leeguoan
See-Leeguoane
See-Leeguoane (Amblyrhunchus cristatus)
Systematik
Oardenge: Skubben-Kjoopdierte (Squamata)
sunner Stappe: Toxicofera
sunner Stappe: Leeguoan-Oardige (Iguania)
Familie: Leeguoane (Iguanidae)
Sleek: Amblyrhynchus
Oard: See-Leeguoan (Amblyrhynchus cristatus)
Beskrieuwen fon BELL, 1825

Die See-Leeguoan (Amblyrhynchus cristatus; düütsk: Meerechse) is endemisk ap do Galápagos-Ailounde, wier hie ap aal do Ailounde, maasttieds loangs do Fäls-Kusten, man uk wäil in do Mangroven-Woolde tou fienden is. Hie is die eensige Leeguoan, die sien Neerenge in'e See soacht. Jo duukje bit tou een hoolwe Uure loang bit tou 15 Meetere joop in't Woater, wier jo Algen ouweedje. Ätters mouten jo in'e Sunne lääse, uum sik aptouwoormjen. See-Leeguoane sunt näämelk wikselwoorme Dierte.

Uum gauer woorm tou wäiden, hääbe jo uk uur ju maaste Tied fon't Jier hiere swotte bit griese Faawe. Bloot in ju Poorengstied wäide do monnelke Dierte (aal ätter dät Ailound, wier jo häärkuume) rood of gräin. Montjene wäide bit tou 1,30 m loang, dät Wiefken bloot 60 cm.

Ju genetiske Fuulfoold fon do See-Leeguoane ap dän heelen Galápagos-Archipel wuude ätter ju Apfiendenge fon fieuw hoast nit bekoande Unneroarde in't Jier 2017 näi klassifisierd un in alwen ferskeedene Unneroarde unnerdeeld.