Sagrada Família

Uut Wikipedia
Wikselje tou: Navigation, Säike (08)
Ju Bausteede fon ju Säärke in 2016
Een Modell, wo ju Säärke leeter uutsjo skäl (bie düt Modell failt een foarsäin groot Kjuus buppeap)

Ju Sagrada Família (heele Beteekenge ap kataloansk: Basílica i Temple Expiatori de la Sagrada Família, Uutsproake: [səˈɣɾaðə fəˈmiɫiə]) is een roomsk-katoolske Votiv-Säärke, ju ju Hillige Familie wäid is un in ju kataloanske Haudstääd Barcelona stoant. Ju Säärke wuude in ju Foarm, as ju sik däälich wiest, fon Antoni Gaudí in dän Stil fon dän Modernisme ploand un is bit däälich nit kloor. Ju wuude in 1882 ounfangd un skäl ätter dän Ploan, dän do Baumäästere hoast hääbe, in't Jier 2026 tou dän hunnertsten Doodesdai fon Gaudí kloor weese.

In dät Jier 2005 noom ju UNESCO ju Wienoachts-Fassoade, ju Apsis-Fassoade un ju Krypta fon ju Sagrada Família as Wiederenge fon dät Waareldkultuuräärfgoud-Toankmoal Wierke fon Antoni Gaudí in hiere Lieste fon't Waareldkultuuräärfgoud ap. Ap dän 7. November 2010 wäide Poabst Benedikt XVI. ju Säärke un moakede ju fluks tou een Basilica minor.

Dät Goddeshuus lait noudelk fon ju Ooldstääd in dän Stääddeel Eixample. In düt Kwattier, dät ounlaid is as n Schachbrääd, nimt ju mäd de Bausteede touhoope, aan heelen 17822 m² grooten Sträitenblok ien. Wan do uurspröängelke Ploanengen uumesät wäide konnen, mouten sogoar noch moor Huuse ourieten wäide, man dät weet me noch nit seküür.

Geskichte[Beoarbaidje | Quelltext bearbeiten]

Josep Maria Bocabella hiede in 1874 ju Idee, een groote Votiv-Säärke in Barcelona tou bauen. Touhoope mäd aan Fereen, die Jäild deerfoar sammelde, koopede hie in't Jier 1881 aan 12.800 m² grooten Bauploats, in een unbebaud Rebät, wier leeter dät Kwattier Eixample äntstounde skuul. Die amtelke Architekt fon ju Diözese, Francesc de Paula del Villar, stoalde sik as Architekt tou Ferföigenge.

Uk wan Bocabella eerste aan Ätterbau fon ju Basilika fon Loreto deer wai staale wüül, hiede del Villar uurs n Ploan un ploande foar't eerste een ferhooldnismäitich sljuchte historistiske Säärke mäd tjo Skiepe. Ap dän 19. Meerte 1882 wuude die Gruundsteen foar ju Säärke laid. Antoni Gaudí waas tou Begin fon dän Bau noch bloot aan litjen Hälpershälper.

Man bolde ätter Baubegin koom dät tou'n Stried twiske ju Bauleedenge un del Villar, sodät die nit moor Architekt fon ju Säärke weese kuude. Ju Bauleedenge wüül dän Pröiwer Joan Martorell toun Architekt hääbe, man die wüül dät nit, uumdät hie in dän Stried ferwikkeld weesen hiede. Insteede fon sälwen ountoutreeden, sluuch Martorell sin jungen Meeoarbaider Antoni Gaudí foar.

Gaudí baude ju al ounfangde Krypta moor of minner so kloor, as del Villar dät al ploand hiede, bloot dät Gewölft moakede hie wät haager. Man hie toachte al uur aan Ploan mäd 18 Toudene ätter, uk wan die domoals wät litjer ounlaid waas, as die eendgultige Ploan.

So as ju Säärke däälich baud wäd, wuude ju fon Gaudí eerste fon 1894 oun ploand. Domoals hiede aan anonymen Spänder een groote Summe jäild foar ju Säärke roat, sodät Gaudí un Bocabella hiere Ploane baldoarich fergratterje moasten. Oun't Eende oarbaidede Gaudí 43 Jiere oun ju Säärke, do lääste füüftien Jiere fon sien Lieuwend moakede hie uurs niks moor. In 1926 hiede Gaudí aan Uunfaal mäd een Sträitenboan un stoorf.

Ju Oarbaid geen do touken tjoon Jiere fääre, man wuude unnerbreeken, as in 1936 die spoanske Burgerkriech uutbriek. Antiklerikoale Gruppen moakeden Skändoal, möärenden dän Gäistelken Leeder fon ju Bausteede un fernäilden Deele fon ju Säärke. Uk Gaudí sien Ploane un Gips-Modelle wuuden deelwiese stukken moaked, jo moasten ätters in moitefulle Oarbaid uut Breekstukke un oolde Fotos rekonstruierd wäide. Dät waas aan Gluksfaal, dät Gaudí fuul mäd Räägelflakte oarbaided hiede, do sik al mäd Hälpe fon heel littik Breekstuk bereekenje lieten. Uk wieren deer noch fuul Meeoarbaidere fon Gaudí, do uur sien Ploane Beskeed wisten.

Fon 1950 oun kuude die Bau al fääregunge. Ap dän 7. November 2010, as die Binneruum fon ju Säärke kloor waas, wuude ju wäid. Man ju Säärke skäl wäil eerste in 2026 kloor weese, as hoast ploand wäd.

Bielden fon ju Bau-Geskichte[Beoarbaidje | Quelltext bearbeiten]

Wällen[Beoarbaidje | Quelltext bearbeiten]

  • Düssen Artikkel stöänt sik foaraaln ap dän Artikkel fon ju düütsksproakige Wikipedia.