Rio Pará
Rio Pará is ju Beteekenge fon een smälle, joop in't Lound griepende Meeresbucht twiske ju Amazonas-Mundenge un dät fääre suudaastelk laine Mundengs-Rebät fon dän Rio Tocantins. Ferbiendengen mäd ju Amazonas-Mundenge bestounde uur deelwiese skipbeere Kanoale, wier Äbbe un Floud Woater truchluuke, sonaamde Furos. Jo skeede uk dät Kusten-Ailound Marajó, dät dät noudelke Ouger fon dän Rio Pará bilget, fon't Fäästlound ou.
Ferloop
[Beoarbaidje | beoarbaidje Wältext]Ju loangsträkkede, fjauer bit twintich Kilomeetere wiede un sowät 180 Kilomeetere loange Bucht lukt sik in wäästelke Gjuchte fon sowät 49°45’ bit sowät 50°15' wäästelke Loangte uur een Sträkke fon 180 Kilomeetere in't Binnelound. In dän aastelken Träädendeel beeget ju wäd breedere, man kuutere Mundengsbucht fon dän Rio Tocantins ou, die deer fon't Suude häär stoadich Sedimente oanespäilen däd un somäd foar ju Äntstoundenge fon toalrieke Ailounde suurget. Moor Äien mundje besunners tichte bie't wäästelke Eende fon ju Bucht, biespilswiese die Rio Anapu, die Rio Pacajá, die Rio Camaraipi un Rio Jacundá (sowät ap'e Hööchte fon Breves). Buppedät rakt dät Twäärsferbiendengen tou ju Amazonas-Mundenge, do in dän Wiksel fon Äbbe un Floud stroomje. Ju Maaste Sediment-Fracht kumt in dän Rio Pará, wan dät Hoochwoater fon dän Amazonas sin Wai truch düsse Furos bit in ju Bucht findt. In't Aaste gungt die Rio Pará in ju Baía de Marajó uur, ju sik sälwen in in Suudatlantik eepent. Truch do ienmundjende Äien is dät Woater fon ju Bucht, ätter't Binnelound wai touniemend, brakkerch.
Ju Haudstääd fon dän ätter'n Rio Pará benaamden jungsten brasilioansken Buundesstoat Pará, die Seehoawen Belém, lait an't aastelke Ouger fon dän meensoamen Mundengstjoachter fon do fon't Aaste kuumende Äien Guajará un Moju, die sik in ju Baía de Marajó eepent.
As Deel fon dän Skipfoartswai Amazonas-Belém wäd die Rio Pará toumäts as Canal de Breves beteekend.
Wällen-Ätterwiese
[Beoarbaidje | beoarbaidje Wältext]- Düssen Artikkel foutet ap dän düütsken Wikipedia-Artikkel.