Rio Araguaia

Uut Wikipedia
Zur Navigation springen Zur Suche springen
Koarte fon do Äien Araguaia un Tocantins

Die Rio Araguaia is een fon links kuumende Sieden-Äi fon dän Rio Tocantins. Junner, wier hie in dän Tocantins fljut, fiert hie mäd 5500 m³/s betjuudend moor Woater as die Tocantins un is mäd 2198 km Loangte een fon do betjuudendste Äien fon Brasilien. Sin Ferloop markierd dät Skeed fon moorere brasilioanske Buundesstoaten. Sin Noome betjudt in ju Tupi-Sproake "Äi fon do Aras".

Ferloop fon ju Äi[Beoarbaidje | Quelltext bearbeiten]

Die Araguaia äntspringt in't Mato-Grosso-Plateau in dän Buundesstoat Goiás tichte bie ju Steede, wier do tjo Buundesstoaten Goiás, Mato Grosso do Sul un Mato Grosso touhoopesteete, wäästelk fon ju GO-341 un dät Skeed fon dän Nasjonoalpark Emas. Fon junner fljut hie noudelk ap dät Skeed twiske do Buundesstoaten Mato Grosso un Goiás, leeter Mato Grosso un Tocantins, un toulääst Pará un Tocantins.

Die Middelloop fon dän Rio Araguaia fljut ferhoodnismäitich breed in een wiedloftige Ieuwene, ju bie Hoochwoater Ruumte foar Uurfloudenge bjudt. Junner deelt sik ju Äi in twäin Ierme, do leeter wier touhoopefljoote un so ju Ilha do Bananal bilgje, dät is dät grootste Äi-Ailound fon ju Waareld. Deer lait die Nasjonoalpark Araguaia, wier uk do Indioanere fon dät Karajá-Foulk woonje. Fääre ju Äi adeel, unner ju Ieuwene, rakt dät Stroomsnällen un sluchthaftige Äängten. Ju Äi mundet bie São João do Araguaia in dän Rio Tocantins. (So is dät touminst definierd, uk wan die Rio Araguaia een grattere Loangte, een gratter Rebät wier hie't Woater uutlukt un moor Woaterfierenge häd.)

In dän Rio Araguaia is biespilswiese ju Fisk-Oard Arapaima gigas tou fienden, aan fon do grootste Swäitwoater-Fiske, un buppedät uk die Äi-Delfin Inia araguaiensis.