Megillot

Uut Wikipedia
Zur Navigation springen Zur Suche springen

As חֲמֵשׁ מְגִלּוֹת / Chamesch Megillot ( חֲמֵשׁ / chamesch" betjudt fieuw, מְגִלּוֹת / megillot is ju Moortoal tou Hebräisk מְגִלָּה / megilla, „Skrift-Rulle“, „Bouk“) beteekent me in't Juudendum touhoopefoatjend fieuw besunnere "Fäästrullen" in dän trääden Deel fon dän Tanach (Tanach is, wät in't Kristendum dät "Oolde Tästamänt" hat). Bie do Juuden sunt do Skriften fon't Oolde Tästamänt so ounoardend, dät die trääde Deel do "Ketuvim" (Skriften) sunt, ätter ju Torah (Bouke Mose) un do Propheten. Monken düsse Skriften of Ketuvim wäide also fieuw Bouke ätter hiere Betjuudenge foar fieuw juudske Fääste as do fieuw Megillot beteekent.

Düsse fieuw Bouke un do Fääste, tou do deeruut leesen wäd, sunt:

  • Rut (foar dät Wiekenfääst (Schavuot) ap dän füüftichsten Dai ätter Pesach, in dän Moai of Juni)
  • Hooch Läid (foar dät Pesach-Fääst, tou Ärinnerenge oun dän Uuttoach fon dät Foulk Israel uut Ägypten, in't Foarjier)
  • Kohelet / Präätenjer (foar dät Loof-Hutten-Fääst of Sukkot, dät in'n Häärst fierd wäd)
  • Kloageläidere (foar dän 9. Av, dät is n Dai in dän Suumer, wier fäästed un foaraaln oun do bee Fernäilengen fon dän Jerusalemer Tämpel in do Jiere 587/586 foar Kristus un 70 ätter Kristus toacht wäd)
  • Ester (foar dät Purim-Fääst, dät is n Februoar of Meerte, do toanke do Juuden oun ju Räddenge fon do persiske Juuden truch ju Kööniginne Ester)

Fonsäärm heere düsse fieuw Bouke uk foar do Kristen tou ju hillige Skrift, man dät düsse fieuw een besunnere Staalenge foar bestimde Fääste hääbe, is aan juudsken Bruuk.