Lucas Cranach (die Allere)

Lucas Cranach (die Allere) (* uum 1475 in Kronach, Bupperfranken; † 16. Oktober 1553 in Weimar) waas aan fon do wichtichste düütske Moalere in ju Renaissance. Hie waas die Foar fon Lucas Cranach dän Jungere. Dän Noome "Cranach" skäl hie sik säärm roat häbe ätter ju Stääd, wier hie bädden is (däälich:Kronach). Hie waas besunners goud bekoand mäd Martin Luther, man uk mäd Philipp Melanchthon, Tiziano Vecellio (Tizian) un Albrecht Dürer.

Ferbiesterjend is, dät dät noch moor Moalere mäd dän Noome "Lucas Cranach" rakt, kiek deertou in dät Fersät "Stomboom"!

Biespilwierke

Kjuusigenge, moald in 1501
Martin Luther, moald in 1526
Dät gouldene Tiedoaler, moald in 1530
Altoarbielde in ju Stäädsäärke St. Marien in Wittenberg, moald uum 1540

Stomboom

In dän foulgjende Stomboom is beliekteekend, wo sik dät mäd ju Moalerfoamielje Cranach ferhoaldt; deer sunt buute do Moalere noch masse Lide in ju Foamielje, man do hier nit ienteekend, uurs wude dät tou stuur. Masse uur dreege uk noch dän Noome "Lucas" in düsse Foamielje, ieuwenske do Moalere.

Hans Maler (?)
     |
Lucas Cranach (die Allere)
        ____|_______________
        |                   |
        |                   |
 Hans Cranach    Lucas Cranach (die Jungere)
                                |
                                |
                          Augustin Cranach
                                |
                                |
                          Lucas Cranach III.