Lütje Hörn

Uut Wikipedia
Lütje Hörn
Statistieke
Ienwoonertaal 0
Fläche 6,5 Hektar
Höchte 6 m. buppe NN
Politik
Buundeslound Läichsaksen
Loundkring Lier (meentefräi)
Koarte fon do aastfräiske Ailounde.

Lütje Hörn is n unbewoond aastfräisk Ailound, dät 3,5 Kilometer aastsuudaastelk fon Borkum lait. Dät Ailound is n meentefräi Gebiet un heert tou dän Loundkring Lier. Dät 6,5 Hektar groote Ailound is n Fuugelreservoat, un is nit foar Moanskene tougongelk.

Skichte[Beoarbaidje | beoarbaidje Wältext]

In dät Jier 1576 wuude dät Ailound foar ju eerste Moal naamd in n Seehoundbouk unner dän Noome ‘’Hooghe Hörn’’. Lütje Hörn is siet 1859 apnuumen in topografiske Koarten, ap dän Wattenrääch suudaastelk fon Borkum.

Geografie[Beoarbaidje | beoarbaidje Wältext]

Uurs as aal do uur aastfräiske Ailounde is ju Loangte fon dät Noude ätter dät Suude gratter as ju Loangte fon dät Wääste ätter dät Aaste. Dät Ailound lait uungefeer 3,5 Kilometer aastsuudaastelk fon Borkum un sowät fjauer Kilometer suudelk fon Memmert lait. Die litste Oustand ätter dät Fästlound is uungefeer 14 Kilometer.

Lütje Hörn wondelt älk Jier n bitje ätter dät Suudaaste wai, siet dät Ailound foar ju eerste Moal naamd wuude häd Lütje Hörn sik uungefeer 2 Kilometer in disse Gjuchtenge ferskäuwen. Truch Erosion in dät Noudwääste un anwoaksen fon näi Lound in dät Suudaaste kon dät Ailound sik ap disse Wiese bewääge. Twiske 1961 un 1999 häd dät Ailound sik moor as 600 Metter ätter dät Aaste un 150 Meter ätter dät Suude bewäägd. Wan me dät uumreekend wondelt Lütje Hörn älk Jier 15 Meter ätter dät Aaste un fjauer Meter ätter dät Suude wai. In do Jiere fon 1999 bit 2005 wondelde dät Ailound noch 100 Meter fääre ätter dät Suudaaste wai.

Truch moor Erosion un minner Groienge is dät Ailound däälich litjer as fröier. In dän eersten Haaldeel fon dät 20. Jierhunnert waas ju Grööte fon dät Ailound noch täämelk stabil. In dät Jier 1891 waas ju Grööte 61 Hektar, in 1937 waas ju 54 Hektar. In 1957 waas noch 58 Hektar fräi fon Hoochwoater un dät Duunegebiet hiede noch ne Grööte fon uungefeer 1 Hektar. Truch ju Stoarmfloud fon Februoar 1962 un ferskeedene Stoarmfloude in dän Winter fon 1989/1990 sunt groote Deelen fon dät Ailound ousleeken. In dät Jier 1987 waas ju Grööte fon Lütje Hörn noch 23 Hektar, n poor Jiere leeter wieren dät noch uungefeer 11 Hektar. Ätter do Statistieke fon dät Niedersächsische Landesbetrieb für Wasserwirtschaft, Küsten- und Naturschutz (NLWKN) hiede Lütje Hörn in dän Suumer fon 2006 noch ne Grööte fon uungefeer 6,5 Hektar, wät bie Hoochwoater druuch blieuwt.[1]

Bit tou 1989 wieren eenige Duunen noch 1,5 Metter buppe Seenivo. Truch fälle Stoarmfloude in 1990 sunt groote Deele fon dät Duunegebiet ousleeken.

Fuugelreservoat[Beoarbaidje | beoarbaidje Wältext]

Däälich is dät Ailound n Fuugelreservoat, un is nit foar Moanskene tougongelk. Et rakt uk neen Bauwierke ap dät Ailound. Do Fuugele, do ap maaste ap Lütje Hörn broude, sunt ju Säälwer- un Hieringsmeeske, Eider (Oante) un ju Austerfisker.

Wikimedia Commons
 Commons: Lütje Hörn – Bielden, Videos un Audiodoatäie

Wällen, Anmäärkengen un Ätterwiesengen[beoarbaidje Wältext]

Wällen, Anmäärkengen un Ätterwiesengen:

  1. Wattenrat.de: Inseln und Platen durch Stürme abrasiert


 
Fräiske Ailounde un Soundplatten

Wäästfräiske Ailounde: Tessel - Flielound - Skylge - Amelound - Schiermönkooge
Nit bewoond: Noorderhaaks - de Richel - It Gryn (Griend) - de Kalkman (Engelsmanplaat) - Rif - Simonssound - Rottumerplaat - Rottum - Suudduunen

Aastfräiske Ailounde: Borkum - Juist - Norderney - Baltrum - Langeooch - Spiekerooch - Wangerooge
Nit bewoond: Kachelotplate - Lütje Hörn - Memmert - Minsener Oog - Mellum

Noudfräiske Ailounde: Hälgolound - Do Halligen - Pellworm - Noudstrand - Amrum - Föhr - Uthörn - Sylt
Nit bewoond: Jungnammensound - Kniepsound - Japsound - Suuderoogsound - Nouderoogsound - Noudstrand

Deensk: Koresound - Jordsound - Romooge - Mandooge - Faanooge - Langli

Unnergeen: Bosch - Bant - Buise