Hugo de Groot
Hugo de Groot (Delft, 10. April 1583 – Rostock, 28. Augustus 1645) waas n niederloundsk Gjuchtsgeleerde un Skrieuwer. Hie is internationoal unner'n Noomen Hugo Grotius bekoand wuuden.
Grotius tält tou do intellektuelle Gruundengsfoars fon't Souveränitätstoanken, ju Natuurgjuchtsleere un dät apkloorde Foulkengjucht. Do Ljuude seegen him as n Wunderbäiden, uumdät hie in'n Oaler fon tweelich Jiere al perfekt Latien un Griechisk baale kuude. Grotius studierde al an ju Universität Leiden do hie alwen Jiere oold waas.
Politiske Leere[Beoarbaidje | beoarbaidje Wältext]
Ätter ju Uunouhongelkaidsferkloorenge fon Do Niederlounde in't Jier 1581, waas hie Deel fon'n näie Generation humanistiske Juristen, do fersoachten dät Begriep Souveränität näi tou definierjen. Hie hiede do näiste leet-humanistiske Äntwikkelengen fon Lipsius sin Ätterfoulger, Joseph Justus Scaliger, leerd un ju Noodseeke anärkoand uum eerst do Fundamente fon do humanistiske Studien fäästtoulääsen foardät hie groote Seeke in ju Politik un Gjucht behondelje kon. So begon hie in een fon sien wichtichste Studien, wäkke nu as De iure praedae bekoand is un in 1603-04 skreeuwen wuude, mäd n Diskussion uur ju methodus fon Unnersäik un ju ordo fon Unnergjucht, foardät hie mäd ju prolegomena fon Gjucht un Politik ounfange kuude. Grotius staalde fääst dät me do Probleeme fon De iure praedae, do Froagen uur Kriech un Free, nit apgruund fon 'skreeuwen Gjucht' analysierje kuude. Bie Unnersäik in Seeke as Kriech un Free moast me uutgunge fon ju ratio naturae, ju natuurelke Reede.
Hie unnersoacht uur Gjuchtsgeleerden un besleet bie antoufangen bie do maast algemeene un universaal jäildende moraalfilosofiske Prinzipien uum dan ätter n loangen matematisken Wai do spezifiske Gjuchtsräägels aptouskrieuwen. In sien fernäiende Argumenten, wäkke me sjo kon as't Begin fon't modärne Toanken in Seeken Natuurgjucht, ferkloorde Grotius dät me toueerst die Sälwenbehehoold (sui-amor) un dan eerst Soziabilität un Fjuundskup (amicitia) as Hauptmäärkmoale fon do Individuen, as hiere natuurelke Fraiegaid, betrachtje skuul, wier älk un een 'fräi un sui iuris' is. Apgruund fon disse Prinzipien unnersoacht Grotius deerätter dän Uursproang fon ju Macht fon do Burgere.
Grotius skrift dät me ju Ferwaltengsmacht uk an Magistroate reeke kon, do Touhoope dät Mandoat foar ju Ferwaltenge kriege un so foar ju republica Wätte moakje konnen foar alle Ienwoonere. Mäd de Introduktion fon't Konzept magistratus wuude ju Teorie fon Jean Bodin uur Souveränität duudelk wächsmieten. Ju Macht uum tou regierjen kuude nit absolut weese, un sogoar nit foar eewich.