Stilkene Sproake

Ne stilkene Sproake of Geheemsproake (dt. Geheimsprache) is ne Sproake ju bloot fon Ienwäiden fersteen wäd. Wan dät uungunstich meend is, kwäd me fon Gaunersproake. Sowät is Rootwälsk. Uk foar Koopljuude is sun Sproake nutselk.

Seeltersk as stilkene Sproake

Do oolde Seelter wieren Skippere un Koopljuude un jo wollen sicher hiere Sproake wäil moal as stilkene Sproake benutsed hääbe. Deerfon rakt dät sogoar Fertälstere.

Nu oainde ju seelter Sproake sik truch hiere besunnere Äärf-Woude un -Luudenge al as stilkene Sproake, wan me hier fergliekt mäd do Noabersproaken:

Seeltersk	ätter	bääte	Bäiden	däälich	Eed	Jäild	kweede	tjo	truch	Tusk
Platdüütsk	nao	achter	Kind	hüte, vandaoge	Törf	Geld	seggen	dree	döör	Tann
Holloundsk	na; naar	achter	kind	vandaag	turf	geld	zeggen	drie	door	tand
Hoochdüütsk	nach	hinter	Kind	heute	Torf	Geld	sagen	drei	durch	Zahn

Dät et sik uk wuudelk uum ne stilkene Sproake honnelde, kon me ouleese an dät besunnere Gebruuk fon wäkke Woude un besunners an dät woarschienelk uut dät Rootwälske uurnuumene Woud baale:

Seeltersk	baale	blouked	fluch	reeke	ron
Platdüütsk	praoten, snacken	seen	moi	gewen	leep
Holloundsk	praten	gezien	mooi	geven	liep
Hoochdüütsk	reden	gesehen	schön	geben (bezahlen!)	lief

Uk ju ganse Touhoopestaalenge fon ju Sproake tjut wai ap Gebruuk as stilkene Sproake.