Ferbiend

Uut Wikipedia
Typen fon Twäärsferbiende.

N Ferbiend is ne portoalfoarmige holtene Dreegekonstruktion in n Buurenhuus, ju der bestoant uut twäin of moor Stonnere, do der mädnunner ferbuunen sunt truch aan of twäin horizontoale Ferbiendsboolken. Do ferskeedene Ferbiende sunt wier mädnunner ferbuunen truch do Rimme, do der winkelgjucht ap do Ferbiende ferloope. Aal Winkele fon ju Konstruktion wäide stutsed fon Steekbeende un Jachtbeende. Do Stonnere stounde oafte ap muurde of aan Steen bestoundene Funnemänte. Ap do Ferbiende stounde do Sponstokke (dät Speerwierk), mäd do Huuslatten, do ju Toake of dät Dak dreege. Do Sponstokke mäd Steekbeende usw konnen fuul ferskeedene Foarme ounnieme un unnerskeede sik in do ferskeedene Buurenhuuse.

Dät rakt two Typen fon Ferbiende, nämmelk dät Loangsferbiend un dät Twäärsferbiend. Bolde aal Buurenhuuse hier in t Noude sunt mäd Twäärsferbiend baud, dät winkelgjucht ap ju Laangtegjuchte fon dät Huus stoant.


Typen Twäärsferbiende[Beoarbaidje | beoarbaidje Wältext]

Onkerboolkeferbiend[Beoarbaidje | beoarbaidje Wältext]

Dit Ferbiend bestoant uut do twäin Stonnere, ferbuunen fon dän woagegjuchte Onkerboolke. Dissen Ferbiendsboolke stat mäd ne Tappe truch dän Stonner un is deerbääte feronkerd mäd aan of twäin holtene Döäwele (Pännen), of Kiele. Dissen Typ rakt dät in dät seelter eepen Huus un me fint dät fääre in dät Nouddüütske un Holloundske Inlound.

Dakboolkeferbiend[Beoarbaidje | beoarbaidje Wältext]

Bie dissen Typ Ferbiend lait die Ferbiendsboolke ap do Stonnere un is mäd ne Tappeferbeend mädnunner ferbuunen. Dissen Typ rakt dät äntloang ju ganse Kuste fon Hollound, Wäästfräislound, Groningen un Aastfräislound. So fint dät sik uk in do Fräiske Huuse fon Seelterlound.

Twiskeboolkeferbiend[Beoarbaidje | beoarbaidje Wältext]

Dissen Typ lät ap dät Onkerboolkeferbiend, man do Döäwele of Kiele an de Bäätersiede sunt nit deer. Dissen Typ rakt dät in wäästelk Hollound.

Kopboolkeferbiend[Beoarbaidje | beoarbaidje Wältext]

Hier lait die Ferbiendsboolke ap do Stonnere. Do Stonnere sunt fersäin mäd n Iensnit, wier die Boolke oun rääst, wült die Kop fon dän Boolke do Stonnere foarbie räkt un do ap ju Wiese tougjuchte haalt. Dissen Typ fint sik in t Suude fon Munster in t Rhienlound wai.


Ferbiendengen[Beoarbaidje | beoarbaidje Wältext]