Cajun Frantsöösk

Cajun Frantsöösk (bietiede naamd Louisiana Regional Frantsöösk [1]) is een fon tjo Variatäte of Dialekte fon ju frantsööske Sproake do der foarallen boald wäide in dän U.S. Stoat Louisiana, foarallen in do suudelke Meenten. Uur Louisiana frantsööske Dialekte sunt Napoleonic Frantsöösk un Colonial of Plantation Society Frantsöösk, do der foarallen boald wäide in Orleans, St. Bernard, St. Tammany, St. Charles, St. John the Baptiste, Jefferson, West Bâton-Rouge, Pointe-Coupée, Avoyelles, St. Mary, Iberia, Assumption, un St. Landry Meenten. Cajun Frantsöösk is nit dätsälge as Louisiana Creole.

Gewöönelk wäd ounnuumen, dät Cajun Frantsöösk bolde gans stamt fon Akadisk Frantsöösk so as dät boald wuude in ju frantsööske Kolonie Akadien (wät liech in wät nu do Kustenprovinze sunt fon Kanada un in dän U.S. Stoat Maine).

Cajun unnerskat sik fon Frantsöösk in Uutsproake, Woudskat un Intonation.

Meenten wier Cajun Frantsöösk uursproangelk boald wuude

Geskichte

In 1755 (unner dän Frantsoosen- un Indioanekriech), wuude sowät 75% fon ju Akadiske Befoulkenge fon ju kanadiske Provinz Nova Scotia deportierd in wät oafte naamd wäd ju Groote Ferdrieuwenge. Moonige fon do siedelden sik wier an in Louisiana, un gruundeden deer hiere Kultuur un Sproake. Truch ju Akadiske Sproake stamt Cajun uursproangelk fon do Dialekte fon Anjou un Poitou in Frankriek (sjuch Poitevin-Saintongeais). Disse Äärwe had wäkke archaiske Woude in dät Dialekt bääte lät, t.B. crevette ("Gernoat") wäd uutspreekena as chevrette.

Mäd de Tied wuude Cajun ju fäästigede Sproake fon fuul Meenten in Louisiana wäästelk fon ju Mississippi Äi. Cajun wuud nit bloot boald fon Cajun Ljuude man uk fon uur ethniske Gruppen do der woonden in Akadisk besiedelde Gestriche. Kreolen, indianiske ethniske Gruppen as do Houma, Chitimacha, Bayougoula, Tunica-Biloxi, Atakapa, Opelousa, Okelousa, un Avoyel leerden truch dät Touhoope-Woonjen in do suudelke Meenten fon Louisiana eendelk uk dät Cajun frantsööske Dialekt. Wäkke Kreole un Indiane boalden al frantsöösk eer do Akadier in Louisiana kuumen dieden.

Die Uutdruk "Cajun" wäd wäil oulat fon ju ängelske Uutsproake fon dät frantsööske Woud “Acadien”. Wäkke Cajuns naame sik "Cadiens" of "Cadjins" ap Frantsöösk. Ju eerste Skrieuwwiese is oulat fon ju frantsööske Skrieuwwiese “Acadien” un ju twäide is ne Annaierenge, ju der frantsööske Phonetik bruukt bie ju Uutsproake in Cajun Frantsöösk. “Cadien” is ju frantsööske Skrieuwwiese, ju do cajun Akademiker ap ljooste bruuke; "Cajun" is n ängelsk Woud, wier jo nit fuul fon hoolde. Dät Haudgestrich wier Cajun Frantsöösk boald wäd, naame do Acadiana (nit tou fertuuskjen mäd Acadia, wiermäd dät Gestrich in Kanada un Maine meend wäd, wier Akadisk Frantsöösk boald wäd). Cajun Gestriche bildje bietiede Partnerskuppe mäd Akadier in Kanada, do der frantsööske Koastere seende uum ju Sproake in de Skoule tou unnergjuchten.

In 1984 publizierde Jules O. Daigle, n katoolsken Gäistelke, A Dictionary of the Cajun Language, dät eerste Woudebouk fon dät Cajun Frantsööske.

Toun Deel uursät ätter [2]

Sjuch uk

Cajun Musik

Literatuur

Cajun French Dictionary and Phrasebook by Clint Bruce and Jennifer Gipson ISBN 0-7818-0915-0. Hippocrene Books Inc.

Tonnerre mes chiens! A glossary of Louisiana French figures of speech by Amanda LaFleur ISBN 0-9670838-9-3. Renouveau Publishing.

A Dictionary of the Cajun Language by Rev. Msgr. Jules O. Daigle, M.A., S.T.L. ISBN 0-9614245-3-2. Swallow Publications, Inc.

Cajun Self-Taught by Rev. Msgr. Jules O. Daigle, M.A., S.T.L. ISBN 0-9614245-4-0. Swallow Publications, Inc.

Language Shift in the Coastal Marshes of Louisiana by Kevin J. Rottet ISBN 0-8204-4980-6. Peter Lang Publishing, Inc.

Conversational Cajun French I by Harry Jannise and Randall P. Whatley ISBN 0-8828-9316-5. The Chicot Press.

Ferbiendengen ätter buuten