Boars

N fangden Boars (Perca fluviatilis)

Systematik

Uuroardenge:	Acanthopterygii
Oardenge:	Perciformes
Unneroardenge:	Percoidei
Familie:	Percidae
Sleek:	Perca
Oard:	Boars (Perca fluviatilis)

Die Boars (Perca fluviatilis, düütsk: Flussbarsch) is ne Oard fon Bunkenfisk.

Määrkmoale

Die Boars is n Fisk mäd moorere dunkere Twäärs-Striepe an n Körper. Hie häd two Räächflunken, wierfon ju Faandere goud ärkanboare Stiekelstroale häd. Buuk- un Bääterflunken sunt roodsk. Ju Loangte fon dät Diert bedrächt gewöönelk 20 - 30 cm, säilden uk gratter man sieläärge nit moor as 51 cm. Die Fisk wächt bit tou 4,75 kg.

Lieuwendsruum

Die Boars lieuwet in rauelk fljootende un stoundende Woatere in groote Deele fon Eurasien. Wan eenige Wietenskuplere, do der kweede, dät hie touhoope mäd ju Amerikoanske Oard Perca flavescens een gemeensoame Oard bildet, gjucht hääbe, rakt dät düsse Oard uk in Amerikoa, man dät is striedich.

Lieuwend fon sun Boars

Doo bleeke Oaiere fon n Boars wäide in bit tou aan Meeter loange Beende oulaid. Ätter füüftien bit twintich Deege sluupje doo litje Boarse. Soloange hie jung is, frät sun Boars wirbelloose Dierte as litje Krääpse un Moaden fon Insekten. Ätter two bit tjo Jiere kon die Boars sik säärm moorje. Wan hie aller is, kon hie uk Fiske frätte, dan frät hie toun Deel sogoar litjere Boarse. Die Boars kon, wan't hooch kumt, tjoon Jiere oold wäide.

Wällen

Peter S. Maitland & Keith Linsell: Süßwasserfische KOSMOSnaturführer ISBN 978-3-440-10962-5