Benutser:Heinz/Steentied

Uut Wikipedia

Die foulgjende Artikkel is noch nit kloor, deeruum stoant hie noch ap een Unnersiede fon mien Benutsersiede.

Rekonstruktion fon n Huus uut ju Jungsteentied.

Ju Steentied, ju Tied, as do Ljuude steenene Reewen häärstoalden un deer mäd wierkeden, is ju loangste Tied in ju Geskichte fon do Moanskene in dän äängere Sin (Sleek Homo). Ju Steentied wäd apgruund fon ferskeedene Fäidegaide, do do Moanskene in dän Loop fon ju Tied kreegen, in unnerskeedelke Phasen iendeelt. Man dät is tou beoachtjen, dät suk een Iendeelenge nit foar älke Region jält. In wäkke Rebätte wuden eer, in uurswäkke leeter Dierte tom moaked. Un foar wäkke Foulke is bit nu tou Steentied!

Foar-Äntwikkelenge[Beoarbaidje | beoarbaidje Wältext]

Uus Foaroolden eer ju Änstoundenge fon bewierkede Steenreewen wieren also fermoudelk uk fäidich, Steene, Stokke un aal, wät jo so hieden, as Reewe tou bruuken, man jo häbe do so nuumen, as jo wieren. Dät lät sik je uk bie uur Moanskenoapen bekiekje. Ju Näihaid is also nit dät Bruuken, sunnern dät Häärstaalen fon Reewen. Unbewierkede natüürelke Deele wäide uk fon wäkke Dierte as Reewen bruukt.

Ju Ooldsteentied (dät Paläolithikum)[Beoarbaidje | beoarbaidje Wältext]

Dät Oold-Paläolithikum[Beoarbaidje | beoarbaidje Wältext]

Oldowan[Beoarbaidje | beoarbaidje Wältext]

Ju ätterwiesbeere Steentied, die Begin fon dät besunnere Häärstaalen fon Reewen, is foar two Millionen un säkshunnertduusend Jiere tou ärkannen. Düsse äddere Phase hat "dät Oldowan" un is benaamd ätter ju bekoande Funst-Steede in ju Olduvai-Slucht in Tansania. Fermoudelk sunt deer do ooldste Fertreedere fon dän Sleek Homo, t.B. die Homo habilis foar feroantwoudelk, man wildääge uk uur Moanskenfoarmen. Do ooldste Steenreewen sunt Steene deerfon an een Siede wät ousloain is, sodät ju een skäärpe Kaante häbe. Dät ängelske Fäkwoud foar düsse Reewen is "Chopper".

Leeter, in dät "äntwikkelde Oldowan", sunt ju al fon two Sieden häär behäuwen, me naamd him dan mäd dät ängelske Woud "Chopping tool". Wäkke fermoudje, dät sik uut do "Chopping tools" die leetere Fästekiel (düütsk:Faustkeil) äntwikkelde, deeruum wäide jo uk wäil "Proto-biface", also "Foar-Fästekiel" naamd.

Wanner do Moanskene begonnen, Fjuur tou bruuken, is nit sunner Twieuwel fäästtoustaalen, uumdät dät stuur is, uut dän archäologiske Befunst natüürelke Fjuurienfloude fon "tom" Fjuur tou unnerskeeden. Daach rakt dät Waiwiesengen, dät do Moanskene al foar moor as een Million Jiere Fjuur bruukt häbe.

Foar sowät 1.800.000 Jiere, in dät Eende fon dät Oldowan, rakt dät foar dät eerste Moal Ätterwiese fon Homo erectus buute fon Afrikoa, wät ju eerste fon fermoudelk tjo groote Uutwonderengswoogen fon Moanskene uut Afrikoa is.

Dät äddere Acheuléen[Beoarbaidje | beoarbaidje Wältext]

Foar sowät 1.760.000 Jiere, mäd ju Ärfiendenge fon dän Fästekiel is dät Oldowan tou Eende un dät Acheuléen begint. Tou beoachtjen is, dät dät (as buppe al uutfierd) uk Uurgongsfoarmen roate un dät nit mädeens geen. Uk die Fästekiel wude wäil noch fon dän Homo erectus ärfuunen.

Uursniedenge fon Acheuléen un Middelpaläolithikum[Beoarbaidje | beoarbaidje Wältext]

Dät Acheuléen eendede in Afrikoa uum uursnit sik mäd dät Middelpaläolithikum, dät Tiedoaler fon ju Levallois-Technik un dän Neanderdoaler:

Al midde in dät Acheuléen wäd ju Levallois-Technik ärfuunen, een besunnere Oard un Wiese fon Steenbeoarbaidenge, ju in dät Middelpaläolithikum typisk wäd. Uk do Foaroolden fon do Neanderdoalere kleeuwden sik fermoudelk in düsse Tied fon do uur Moanskene ou un wonnerden uut ätter Europa, wier sik die Neanderdoaler uur ju Twiskestappe fon dän sonaamde Homo heidelbergensis äntwikkelde. Ju Theorie, dät die Neanderdoaler uut düsse twäide un nit uut ju eerste Uutwonnerenge uut Afrikoa äntsteen is, wäd uk deertruch stöänd, dät do Moanskene fon ju eerste Uutwonnerengswooge noch ful litjere Braingen hieden un buppedät noch neen Levallois-Technik koanden, ju eerste in dät Acheuléen äntdäkt un leeter, in dät Middelpaläolithikum, een gjucht wichtige Technik fon do Neanderdoalere wude.

Middelpaläolithikum[Beoarbaidje | beoarbaidje Wältext]

Foar sowät tjohunnertduusend Jiere begint dät Middelpaläolithikum.





Dissen Artikkel is n Stump.
Hälp jädden deeran mee, dät tou ferbeeterjen.