Belmopan

Uut Wikipedia
Zur Navigation springen Zur Suche springen
Belmopan fon buppe
Dät Parlemänts-Huus

Belmopan is ju Haudstääd fon dät middel-amerikoanske Lound Belize un hiede in't Jier 2017 sowät 21.814 Ienwoonere. Dät is een relativ junge Ploanstääd, ju ap een seekerere Steede gruunded wuude, uumdät aan dweerelgen Stoarm ju oolde Haudstääd Belize City läip ferseerd hiede. Die Noome fon ju Stääd is aan kunstelken Begriep, die sik touhoopesät uut dän Loundnoome "Belize" un Mopan, dät is een Äi, ju truch dät Rebät lopt.

Belmopan lait aastelk fon dän Belize River ap 17° 15' noudelke Bratte un 88° 46' wäästelke Loangte, 76 Meetere buppe ju See. Ju Stääd lait in ju Provinz Cayo, sowät 80 km fääre in't Binnelound as ju eerdere Haudstääd Belize City.

Geskichte[Beoarbaidje | Quelltext bearbeiten]

Ap dän 31. Oktober 1961 fernäilde die Hurrikan Hattie groote Deele fon ju domoalige Haudstääd Belize City.

In't Jier 1965 wuude die eendgultige Besluut foated, een näie Haudstääd ap een seekerere Steede tou bauen, fääre in't Binnelound. Ap dän 1. August 1970 waas ju amtelke Stäädgruundenge fon dät näi baude Belmopan.

In dät sälge Jier wuude die Regierengssit fon ju domoalige britiske Kolonie Britisk Honduras ätter ju näie Haudstääd ferlaid. Do Regierengs-Huuse sunt in modernen Stil baud, man jo hääbe daach uk wäil Määrkmoale fon ju klassiske Maya-Baukunst.

Eerste ap dän 21. September 1981 wuude Belize uunouhongich fon do Briten, Belmopan häd also fon Begin oun ju Haudstääd fon dät uunouhongige Lound weesen.

Uurspröängelk is Belmopan foar 40.000 Ienwoonere ploand wuuden, man ju Befoulkenge is ätter ju lääste Tällenge (Stound: 2017) bloot wät moor as hoolich so groot. Dät lait wildääge oun dät heet-fuchtige Klima un ju Loage in't Binnelound. Do maaste groote Firmen un Organisationen, juust so uk do maaste diplomoatiske Boskuppe hääbe hieren Sit juust as toufoarne in Belize City.