Basseterre

Uut Wikipedia
Glap ap ju Stääd
In ju Stääd
Een Säärke

Basseterre (frantsöösk foar "Unnerlound") is ju Haudstääd fon ju Ailound-Föderatsjoon St. Kitts un Nevis in do Litje Antillen. Basseterre lait oun ju suudelke Kuste fon dät Ailound St. Kitts.

Geskichte[Beoarbaidje | beoarbaidje Wältext]

Basseterre wuude fon frantsööske Kolonisten unner ju Fierenge fon Pierre Belain d’Esnambuc uum 1627 gruunded. Ju Stääd waas ju eerste fääste frantsööske Kolonie in ju Karibik. As in't Jier 1639 Phillippe de Longvilliers de Poincy die Frantsööske Gouverneur fon St. Kitts wuude, wonnelde sik ju Stääd tou een groote, ärfoulchrieke Hoawenstääd, ju dän Honnel un ju Kolonisierenge fon ju aastelke Karibik bestimde. De Poincy moakede Basseterre dan gau tou ju Haudstääd fon aal do Frantsööske Kolonien in do Wäästindiske Ailounde, uk Gouadaloupe un Martinique. Dät bleeuw so bit tou sin Dood in 1660, ätters waas ju Betjuudenge wier wät litjer. In 1727 wuude dät tou ju Haudstääd fon dät Ailound St. Kitts moaked.

Leeter wuuden do Frantsoosen ferdrieuwen un do Briten uurnoomen ju Kontrolle.

Uk wan ju Stääd unner Kolonioalkriege un Natuurkatastrophen tou lieden hiede, rakt dät noch fuul goud apsteede broachte oolde Bauwierke uut ju Kolonioal-Tied. Däälich lieuwje moor as aan Fjoodendeel fon ju Befoulkenge fon dän heelen Stoat, sowät 13000 Ienwoonere, in ju Haudstääd (Stound: 2009). In ju Stääd of tichtebie rakt dät twäin Lufthoawen un wäkke Sukker-Raffinerien.

Gloowe[Beoarbaidje | beoarbaidje Wältext]

Ju Betjuudendste Religion in ju Stääd is dät Kristendum, dät hier in ferskeedene Konfessionen fertreeden is. Ju grootste Konfession sunt in Basseterre do Anglikoanere, wät fon ju britiske Kolonisierenge häär kumt. Man dät rakt uk uurswäkke, t.B. Katoolske un Methodisten.

Deer wäd uk fuul afro-kristelken Synkretismus bedrieuwen.

Betjuudende Säärken-Bauwierke fon Basseterre sunt ju Anglikoanske Sänt-Georgs-Säärke (ängelsk: St. George's Anglican Church) fon 1844 un ju katoolske Konkathedroale fon dän uunbefläkkeden Äntfangst (ängelsk: Basseterre Co-Cathedral of Immaculate Conception) fon 1927/1928.

Sport[Beoarbaidje | beoarbaidje Wältext]

Die Foutbaal-Fereen Garden Hotspurs FC kumt uut ju Stääd.