Säikmaskiene

Uut Wikipedia

Ne Säikmaskiene is ne Siede ap Internet mäd n Program deeroane, wier me apsäike kon, wät aal ap Internet stoant. Die Gebruuk kostet die niks, dan ju Maskiene wäd betoalt uut n bitje Wierwenge, wät deerbie stoant. Of fielicht kon wäl sien Siede juun Betoalenge uk haager in do Resultoate kriege. Man uurs wäide do Fiendesteeden gewöönelk oudrukt ätter wofuul Besäikere do kriege.

Dät Gewaltige fon ne Säikmaskiene is, dät ju nit bloot do Tittele fon uur Internetsieden ättergungt, man sogoar älk Woud. Bloot wan die Moaker fon ne bestimde Internetsiede nit wol, dät sien Siede ap ne Säikmaschiene kumt, dan kon hie dät ounreeke mäd ne Kode. (In HTML stoant dan twiske <head> un </head>: <meta name="robots" content="noindex">).

Dät rakt ferscheedene Säikmaskienen. Me kon do sälwen ferglieke. Ne ganse Lieste rakt dät ap https://web.archive.org/web/20070816064149/http://www.dmoz.org/World/Deutsch/Computer/Internet/Suchen/Suchmaschinen/
Ap n 9. August 2007 foont iek ap ju Säikmaskiene Google 1250 x seelter. Wofuul finst du nu? Wofuul finst du ap uur Säikmaskienen?

Oafte kricht me eer toufuul as toumin Resultoate. Me kon dan n uur Woud deerbie sätte, wät dan uk in do Resultoate stounde schäl. Dan typt me t.B. seelter Stukke in dät Säik-Fäk. Nu rakt dät man 5 Resultoate un kon me sik beeter uutsäike wät me wol. Man dät kon noch toufuul wäide un dan kon me dät twiske Anfierengsteekene sätte: "seelter Stukke". Nu kikt ju Säikmaskiene bloot ätter Fälle, wier do bee Woude wuudelk bäätenonner stounde un kriege wie bloot een Resultoat.