Paltoga

Uut Wikipedia

Paltoga (rusk: Палтога) is n Täärp in Ruslound. Dät heer tou ju Rajon Wytegra binne ju Oblast Wologda. Dät wuude in 2001 as Touhoopelääsenge fon moorere Täärpe gruunded: Akulowo (Акулово), Aristowo (Аристово), Wasjukowo (Васюково), Kasakowo (Казаково), Korobeinikowo (Коробейниково), Kusnezowo (Кузнецово), Paltogski Perewos (Палтогский Перевоз), Ruchtinowo (Рухтиново), Semjonowo (Семёново), Sucharewo (Сухарево), Tronino (Тронино), Ugolschtschina (Угольщина), Tschebakowo (Чебаково) und Jaschkowo (Яшково).

In ju aalruske Foulkställenge uut dät Jier 2002 wuuden in dät Täärp 295 Ljuude täld, deerfon 135 Monljuude un 160 Wieuwljuude. 99 % fon do Bewoonere wieren Russen.

Eepentelke Iengjuchtengen[Beoarbaidje | beoarbaidje Wältext]

In dät Täärp rakt dät een Skoule, moorere Winkelhuuse, twäin "Feldscher-Punkte" (Фельдшерско-акушерский пункт), do ju mediziniske Fersuurgenge seekerstaale skällen, two Bibliothäiken un tjo Kultuur-Iengjuchtengen.

Ap dän Säärkhoaf fon dät Täärp stounde two orthodoxe Säärken, ju holtene Epiphanien-Säärke (Церковь Богоявления Господня) uut dät Jier 1733 un ju steenene Säärke fon ju Goddesmuur-Ikone fon't Teeken (Церковь Иконы Божьей Матери Знамение). Do bee Säärken sunt in ju Sowjet-Tied sleeten wuuden, ätters roate dät in do 1990er Jiere fersäike, do wier apsteede tou brangen, man deer is nit fuul uut wuuden. Uumdät ju nit kloor restaurierd wuude, fäl ju allere Holt-Säärke in't Jier 2009 in sik touhoope. As me ap do Bielden sjucht, roate dät touminst Fersäike, do noch stoundende Räste fon ju oolde Säärke tou seekerjen. Fääre is bekoand, dät me do touhoopefaalene Deele insammeld un ferwoard häd, uum ju Säärke tou goadelke Tied wier apbauen tou konnen, wierbie n bestimden Tiedpunkt nit fääststoant.[1] Uk ju steenene Säärke is in een läipe Ferfoatenge.

Wällen[Beoarbaidje | beoarbaidje Wältext]

  • Düssen Artikkel foutet deelwiese ap do Versionen in ju Düütske, Ängelske un Ruske Wikipedia.

Moor Wällen[Beoarbaidje | beoarbaidje Wältext]

  1. https://de.rbth.com/reisen/79886-schwindenden-schaetze-russischer-norden-dorf-paltoga