Bimetal

Uut Wikipedia
Wikselje tou: Navigation, Säike (08)
Wierkenge fon Bimetal. Links ju koolde Toustand, gjuchts woorm. In do unnerste Teekengen sunt do bee Striepen annunner näided. Ju Uutsättenge un ju Beegenge sunt hier gjucht uurdrieuwen wierroat.
Wooge-Thermostoat foar Säntroal-Bäitenge
2 = bimetallene Striepe, 4 = Skalter, die Ferbiendenge moaket as hie ju metallene Pänne 5 roaket.
Ju 2 Euro-Munte, uk ne Anweendenge fon Bimetal

Die Uutdruk Bimetal wäd foar ferskeedene Seeken anwoand. Dät beträft altied Dingere, do der bestounde uut two uunglieke Metalle, do gjucht fääst mädnunner ferbuunen sunt. Ju Betjuudenge, in ju die Uutdruk ap maaste anwoand wäd, is in Metalle mäd uunglieke Uutdienengskoeffiziente, uum Thermostoate un Thermometere tou moakjen. Dät rakt oawers uk gans uur Anweendengen fon Bimetal, so bestounde toun Biespil Kringsoagen mäd bimetallene Sniedebleede, uum Sponkraft mäd Ounutsengsfäästegaid tou kombinierjen.

Thermostoat un Thermometer[Beoarbaidje | Quelltext bearbeiten]

Ne bimetallene Striepe foar n Thermostoat bestoant uut two uunglieke apnunner walsede Stukke Metal, (oafte Invar un rostfräien Stäil). Disse two Materioale hääbe uunglieke Uutdienengskoeffiziente, wiertruch dät Bimetal bie Temperatuurannerengen beegjen däd: dät eene Metal dient daach stäärker uut as dät uur. Uum ne gratterer Uutwiekenge tou kriegen of ne grattere Ferstaalkraft, bruukt me ne laangere Striepe. Gewöönelk wäd ju Striepe spiroalfoarmich troald, sodät ju in ne litje Gehüüse paaset. Foar allerhound Temperatuurbewoakengsswäkke wäide Bimetalkonstruktione anwoand, as bie dän Thermostoat in n Köilskap of bie ju Bäitenge (Haitsenge). Dan wäd foarallen mäd dät Bimetal n Skalter betjoond. Um dät Effekt antouweenden in n Thermometer (Bimetalthermometer), wäd ju Uutwiekenge uurbroacht ap n Wieser, die der uur ne iendeelde Skala bewääget.

Mäd Bimetal konnen aal temperatuurgeföilige Skaltere moaked wäide; Bimetal-Skaltere wäide unner uur anwoand in Startere fon Fluoreszenzlaampen un uk as thermiske Sicherenge. Sukke Skaltere rakt et toun Biespil in Woatersjoodere, Stoafsuugere, Striekiersene usw.

Bimetal un Legierenge[Beoarbaidje | Quelltext bearbeiten]

Ne Legierenge is wät gans uurs as n Bimetal: bie ne Legierenge sunt two Metalle mädnunner misked, wült n Bimetal bestoant uut two düütelk tou unnerskeedende Stukke uungliek Metal.