Putumayo (Äi)
Die Río Putumayo, ap Quechua un histoorisk Putumayu (putu "as Behooldnis tjoonjende groote Frucht", mayu "Äi"; ap Inga-Kichwa Valsayacu of Walsayaku: walsa Balsaboom, yaku "Woater"), in dän unneren Deel fon sin Ferloop (in Brasilien) Rio Içá, is een Äi in Suud-Amerikoa. Hie fljut in Brasilien tichte bie San Antônio do Içá in dän Amazonas.
Ju 1813 km loange Äi häd een Woaterfierenge fon 8760 m³/s. Die Putumayo is in bienaist sien heele Loangte goadelk foar ju Skipfoart un is deermäd n wichtigeren Woaterwai as die noudelk parallel ferloopende Río Japurá. Hie is n Transport-Wai foaraaln foar ju Fäi-Wirtskup (4 % fon dät Rebät, wier hie sien Woater fon kricht, sunt Gäärslound) un foar ju Kautschuk-Industrie.
Die Putumayu äntspringt unner dän Noome Río Guamuez ap'e Naite fon Pasto, Kolumbien, in dän La Concha-See. Die Guamuez fljut ätter dän Uuttreed uut do Anden ätter't Suudaaste truch dän Tropisken Rienwoold (die moaket 87 % fon dät Lound uut, wier hie sien Woater fon kricht). Fon Puerto Asís oun bilget hie unner dän Noome Putumayo dät suudwäästelke Skeed fon Kolumbien ätter Ecuador un Peru.
Ätter düsse Äi häd dät kolumbioanske Departamento Putumayo sin Noome.