Kleopatra VII.

Uut Wikipedia
Oubieldenge fon Kleopatra VII.

Kleopatra VII. Philopator[1] (Ooldgriechisk:Κλεοπάτρα Θεά Φιλοπάτωρ); * 69 f. Kr.; †  12. August 30 f. Kr. in Alexandria) heerskede as lääste Kööniginne fon dät ägyptiske Ptolemäer-Riek un as läästen wieuwelken Pharao fon 51 bit 30 foar Kristus. Uur hieren Foar koom ju uut ne griechisk-stommige Heerskerlinje (do Ptolemäere), hiere Muur kuude oaber ne Ienheemske weesen hääbe. Touminst is uurlääwerd, dät ju sälwen ieuwenske Griechisk uk Ägyptisk baale kuud. Ju heerskede in ju eerste Tied nit aleenich, sunnern mäd hieren Bruur un leeter mäd uur Monljuude touhoope, uumdät die Troon nit fon een Persoon besät wäide doarste.

Ju wüül dät ägyptiske Riek fäästigje un uutbaue, man ju kuude dät Siel nit juun Room truchsätte. Uum Foardeele foar Ägypten tou roakjen, begon ju eerste n Ljoofte-Ferhooldnis mäd Gaius Iulius Caesar, mäd dän ju uk n Suun (Ptolemaios XV. Kaisar) hiede. Caesar wuude in 44 f. Kr. uumebroacht. Ätters begon ju uk mäd Marcus Antonius n Ferhooldnis, man dät fierde tou ne joope Ferwikkelenge in binnere Striedegaiden fon't Roomske Riek, wiertruch Octavianus in 32 f. Kr. dän Ptolemäisken Kriech juun hiere un Antonius sien Troppen begon. In ju Slacht bie Actium (31 f. Kr.) wuuden groote Deele fon Antonius sien Flotte fernäild, man Kleopatra un hie kuuden ätter Ägypten fluchtje. Man sowät n Jier leeter wuude truch n Siedenwiksel fon ägyptiske Troppen Alexandria fon Octavian iennuumen. Antonius un Kleopatra broachten sik sälwen uume un Ägypten wuude tou ju roomske Provins Aegyptus.

Foutnooten[Beoarbaidje | beoarbaidje Wältext]

  1. Ätter ju Tällenge fon do ptolemäiske Köönige un Kööniginnen fon NWerner Huß: Ägypten in hellenistischer Zeit 332–30 v. Chr. München 2001, wäd Kleopatra VII. as Kleopatra VIII. un hieren Bruur Ptolemaios XIII. as Ptolemaios XII. apfierd.