Massaker bie Wounded Knee

Massengrääf fon do Indioane ätter dät Massaker. Do Indioanelieken sunt stieuw fäärsen.

Dät Massaker bie Wounded Knee geböärde an n 29. Dezember 1890 bie ju Steede Wounded Knee twiske ne Gruppe fon do Lakota (Plains Sioux) Indioaner, do uut hiere Reservation fluchted wieren un un ju soogende beriedene Division fon de US-Armee. Dood bleeuwen toumindest 150 Indioaner un 25 US-Suldoaten un moonige moor wuuden wuunded.

Ju Foargeschichte waas, dät Deele fon do Indioane in do Reservatione unner dän Ienfloud fon dän soonaamde Ghost Dance (Dons fon do Gäiste) roakeden. Jo toachten, dät dät n Wai reeke schuul, wier fräi tou kuumen fon ju Heerskup fon do Bleekgesichtere. Deeruum moakeden se monken uur Seeken n besunneren (Gäister-) Dons. Deerfon koom dät dan uk, dät do Indioaner uut do Reservatione fluchteden. Ju soogende Division foont do Indioaner un wüül do wier touräächbrange ätter ju Reservation. As do Suldoaten ounfängen, fon do Indioane do Woapene wächtouniemen, koomen bee Gruppen an t fjuchten. Do Suldoaten fängen dan oun, mäd hiere Ruure un Kanonen tou schjooten. Dät Massaker bie Wounded Knee wäd betrachted as dän Ouslus fon do Kriege twiske de USA un do Indioaner, afwäil dät uk leeter noch litje Gefächte roate.

Literatuur

• Coleman, William S.E. Voices of Wounded Knee, University of Nebraska Press (2000). ISBN 0-8032-1506-1.
• Smith, Rex Alan. Moon of Popping Trees, University of Nebraska Press (1981). ISBN 0-8032-9120-5.
• Utley, Robert. The Indian Frontier 1846-1890, University of New Mexico Press (2003). ISBN 0-8263-2998-5.
• Yenne, Bill. Indian Wars: The Campaign for the American West, Westholme (2005). ISBN 1-59416-016-3.
• Brown, Dee. Bury my Heart at Wounded Knee: An Indian History of the American West, Owl Books (1970). ISBN 0-8050-6669-1.