Seeltersk an do Skoulen

Uut Wikipedia
Wikselje tou: Navigation, Säike (08)

In dät düütske Bildengssystem sunt do Skoulen ju ätter dän Bäidenstuun foulgjende Stappe. An aal do Litje Skoulen (Grundschulen) in Seelterlound un bie dät Skoulsäntrum Seelterlound kriege do Skoulkere Seeltersk-Unnergjucht. Mäd dän Seeltersk-Unnergjucht an do Skoulen wuud in dät Jier 1996 ounfangd. Dät wieren in do eerste Jiere noch eerenamtelke Unnergjuchtere. In 2011 kriege där 150 Bäidene an do Skoulen Seeltersk-Unnergjucht.

Seeltersk an do Skoulen in Seelterlound[Beoarbaidje | Quelltext bearbeiten]

Johanna Evers in dän Seeltersk-Unnergjucht

Seeltersk an do Litje Skoulen[Beoarbaidje | Quelltext bearbeiten]

An do Litje Skoulen (Gruundskoulen) in Seelterlound konnen do Bäidene een Uure Seeltersk-Unnergjucht in ne Wiek kriege. Die Seeltersk-Unnergjucht is fräiwillich.

Seeltersk an dät "Schulzentrum Saterland" in Roomelse[Beoarbaidje | Quelltext bearbeiten]

An ju Haupt- un Realskoule fon ju Grote Skoule fon't Seelterlound in Roomelse is Johanna Evers Koasterske foar dän Seeltersk-Unnergjucht.

  • An ju Hauptskoule rakt dät apstuuns naan Seeltersk-Unnergjucht.
  • An ju Realskoule konnen do Bäidene Seeltersk as "Wahlpflichtkurs" kriege.

Laurentius-Siemer-Gymnasium in Roomelse[Beoarbaidje | Quelltext bearbeiten]

  • An dät Gymnasium rakt dät apstuuns noch naan Seeltersk-Unnergjucht.
Do Winnere fon dän Leese-Wädstried 2009 fon do Gruundskoulen un dät Skoulsäntrum in Seelterlound
Do Winnere fon dän Leese-Wädstried 2011

Leese-Wädstried[Beoarbaidje | Quelltext bearbeiten]

An älke Skoule wäd alle two Jiere n Leese-Wädstried feranstaltet. Tou dissen Wädstried wäd fon ju "Oldenburgische Landschaft" aproupen. Tou ju Jury heere dan Seeltersk-Unnergjuchtere, Seelterske Autore un n Fertreeder fon dän Seelter Buund. Do Bääste fon älke Skoule kriege ne Underskeedenge un n fluch Seeltersk-Bouk.

Do Bääste fon älke Skoule nieme dan an n Wädstried foar alle Skoulen fon Seelterlound deel. Deer wäide dan do bääste Seeltersk-Skoulkere fon alle Skoulen fon dät Seelterlound fon ne Jury uutfuunen. Tou ju Jury heere uk wier Seeltersk-Unnergjuchtere un Seelterske Autore. As Eerengaste sunt Fertreeder fon dän Seelter Buund, fon eepenbeere Institute, fon dän Loundkring Kloppenbuurich, fon ju Meente Seelterlound un fon ju "Oldenburgische Landschaft" deerbie. Do Winnere kriege dan ne Uurkunde, n Jield-Goudskien, n Seeltersk-Bouk un n Goudskien foar ne flugge Feranstaltenge af n Museums-Besäik.

Näi Projekt "Seeltersk an do Skoulen"[Beoarbaidje | Quelltext bearbeiten]

Ap ju Meegliederfersamlenge fon dän Seelter Buund in n Oktober 2010 is n näi Projekt "Seeltersk an do Skoulen in Seelterlound" truch Ingeborg Remmers foarstoald wuuden. Die Ploan is, dät alle Bäidene al in ju eerste Klasse fon do Gruundskoulen uutsäike konnen, af jo in ju Seeltersk-Klasse af in uurs een Klasse wollen. In ju Seeltersk-Klasse skäl dan alleenich Seeltersk boald wäide, mäd Uutnoame fon do Feeke Düütsk un Ängelsk. Tou ju Projektgruppe heere alle Seeltersk-Koastere fon do Skoulen fon dät Seelterlound. Foar dit Projekt mouten dan noch moor Koastere in Seelterlound toueerst noch Seeltersk leere, deermäd skul 2011 an two Gruundskoulen ounfangd wäide, so dät 2012 dät Projekt ounfanged is. Disse eerste Stappe is n Projekt fon ju "Ostfriesische Landschaft". Do Kosten betoalt dät "Niedersächsische Kultusministerium". Dät Projekt woord steund fon ju "Ostfriesische Landschaft", ju "Oldenburgische Landschaft", ju Universität Ooldenbuurich un dän Seelter Buund. Alle Seeltersk-Koastere in Seelterlound moakje mee bie dän Oarbeidskring fon ju näie Projektgruppe foar "Seeltersk an do Skoulen in Seelterlound". Dät ganse Projekt kostet sowät 60.000 Euro. Dät Jield mout noch sammeld wäide un deer wäide noch "Sponsore" foar soacht.[1]

Sjuch uk[Beoarbaidje | Quelltext bearbeiten]

Ferbiendenge ätter Buten[Beoarbaidje | Quelltext bearbeiten]

Wällen, Anmäärkengen un Ätterwiesengen[Beoarbaidje | Quelltext bearbeiten]

Wällen, Anmäärkengen un Ätterwiesengen:

  1. Koastere leere Seeltersk (Nordwest Zeitung)