Seelter

Do Seelter, af loanger: Seelterfräisen sunt een fräisk Foulk un sänt oolde Tied do Ienwoonere fon Seelterlound. Traditsjonell baale jo as Muurtoal Seeltersk, Man däälich is dät uk fuul Plat un bupperloundsk Düütsk, sodät me nu appaasje mout, dät dät Seelterske nit uutstäärft.

Kultuur un Bruuke

Traditsjonelle Wirtskupsfoarmen wieren:

• Buuräi
• Honnel un Skipfoart
• Eedgreeuwen
• Floaksferoarbaidenge
• Imkeräi

Traditsjonelle Baukunst:

• Eepen Huus (Bloot noch in't Museumstäärp Kloppenbuurich tou sjoon).

Traditsjonelle Toal:

• Seeltersk (Wiertou sänt eenige Tied moor un moor Seelterfräiske Literatuur äntstoant)

Fääre:

• Dracht

Uur dät Woud "Seelter"

"Seelter" is uk Biewoud bie Seelterlound, bie seelter Ljuude un bie ju Sproake. Substantivisk bruukt hat dät seeltersk: hie boalt Seeltersk.

Tou ju Etymologie rakt dät two wichtige Fermoudengen:

• 1. Fermoudenge: Dät lat sik fon ju Comitia Sygeltra ou, deerfon Seelterlound aleer wildääge beheersked waas.

• 2. Fermoudenge: Seelter kumt fon Seelounder, wät niks mäd ju niederloundske Region Seelound tou dwoon häd, man ful moor deermäd, dät do Seelter weerskienelk uurspröänelk fon ju Kuste in't Binnelound keemen sunt.