Caracas

	Caracas; Santiago de León de Caracas
	Statistieke
Ienwoonertaal	1.815.679 (2009)
Befoulkengstichte	1431,5/ km²
Agglomeration	1930 km² ; 5.196.514 Ienwoonere
Höchte	900 m
	Politik
Lound	Venezuela
Distrikt	Distrito Capital & Miranda
Gemeente	Libertador
Buurmäster	Antonio Ledezma (ABP)
	Uur
Stiftenge	25. Juli 1567
Tiedzone	VST (UTC-04:30)
Koordinoaten
Websiede	www.alcaldiamayor.gob.ve

Caracas (amtelk: Santiago de Léon de Caracas) is ju Haudstääd un grootste Stääd fon Venezuela. Ju Stääd jält as kulturellen un wirtskuppelken Middelpunkt fon dät Lound. Uumdät dät deer so fuul kriminelle rakt un so fuul Ljuude uumebroacht wäide, jält ju Stääd as een fon do freeselkste Steeden ap ju Waareld buute fon Kriechsrebätte.

Geskichte

Kolumbus roakede in 1498 as eersten Europäer ju Kuste fon Venezuela ap'e Naite fon wier nu Caracas lait. Junner äntstuude een litje Kolonie, ju Koarl V. as Leen fon ju Kroune Kastilien dän Honnelsheer Welser in Augsbuurg as Wiergoudmoakenge fon een "Anleihe" äärwelk uurroate. Man do Welser beheelten ju Besittenge bloot bit 1546.

Ju wuddelke Stääd wuude in 1567 fon dän spoansken Konquistador Diego de Losada unner dän uurspröängelken Noome Santiago de León de Carácas gruunded. Leeter waas Caracas Haudstääd fon een spoansk Generoalkapitanoat un Sit fon dän Gouverneur.

Uum 1750 blöide ju Stääd ap truch dän groienden Export fon Kakao.

In dän Uunouhongegaidskriech wuude ju Stääd ap dän 29. Juli 1811 un noch insen 1814, ätterdät ju truch Simón Bolívar befräid wuuden waas, fon spoanske Troppen iennuumen. In 1821 foulgede wier een Befräienge un Caracas waas ätters bit 1831 Bestounddeel fon ju Republik Grootkolumbien, bit Venezuela sik deer in 1830 as oainen Stoat fon oukleeuwen diede.

Ju Stääd wuude moorere Moale fon Äidbieuwjen ferseerd. Al in 1755 wuuden junner läipe Skoaden oungjucht. Heel un aal fernäild wuude Caracas truch een Bieuwjen ap dän 26. Meerte 1812, beskrieuwen fon Alexander von Humboldt, sowät 12.000 Moanskene sunt deerbie uum't Lieuwend keemen. Ätters wuude ju Stääd immer wier apbaud, man maasttieds sunner do fernäilde kolonioale Bauwierke, sodät Caracas deer nit moor fuul fon häd. Man ju Kathedroale, een fieuwskiepige Basilika fon 1614 mäd een Fassoade fon 1710 bit 1713, is ärheelden blieuwen.

Caracas hiede in't Jier 1873 eerste 60.010, man in 1883 al 70.198 Ienwoonere. Ju Industrie waas in düsse Tied noch nit hooch äntwikkeld, man dät roate al masse Bieldengs-Iengjuchtengen. Een 45 km loange Woaterleedenge fersuurgede ju Stääd. Bit 1904 steech ju Ienwoonertoal ap 90.000

Fon 1930 oun roate dät truch dän Oulje-Ruusk een Befoulkengs-Explosion.

Däälich is Caracas een aiske freeselke Stääd, do Kriminoalitäts-Roaten sunt extrem hooch. Mäd sowät 120 Moorte ap 100.000 Ienwoonere älk Jier (sowät 280-moal so fuul as in Aastriek) wiest Caracas in't Ferhooldnis tou ju Ienwoonertoal ju hoochste Moort-Roate fon ju Waareld ap. (Stound: 2016)

Ap dän 1. September 2016 geenen in Caracas sowät een hoolwe Million regierengskritiske Demonstranten ap ju Sträite un aaskeden ju Ousättenge fon dän sosjoalistisken Präsident Nicolás Maduro. Dät waas ju grootste politiske Kundreekenge in Venezuela sänt Jiertjaande.

Wällen

Düssen Artikkel stöänt sik ap ju düütsksproakige Wikipedia.