Haspel

Uut Wikipedia
Wikselje tou: Navigation, Säike (08)
die Haspel un wät deer tou heert.

Dissen Artikkel beskrift dän Wai fon dät Jäiden twiske Spinnen un Weeuwen.
N Haspel is ne Reewe, ju dertou tjoont, dät Jäiden ätter dät Spinnen tou Dokken tou bienden, do der bie n Weeuwer feroarbaided wäide konnen. Die Weeuwer bruukt dan ne Kroune, uum dät ap sien groote Piepen tou kriegen. Do kuume atters in ne Skäärlaadere, wierfon do ap dän groote Roome tou ju Kätte skäärd wäide, ju me benutset in dät Weeuwerstäl.

Oarbaidswiese[Beoarbaidje | Quelltext bearbeiten]

Wan ju Piepe fon dät Wäil ful is, dan kumt dät Jäiden ap n Haspel. Deerfoar wuud ju Piepe in den Boudem fon den Haspel stat un dät Jäiden wuude aphaspeld. Die Haspel is touhoupesät uut Boudembrääd, fjauerkaantigen Apstok, Oakse mäd n littik Rääd un n Kamrääd un foar de Oakse n Kjuus as bie ne Määlne. Ap do fjauer Eenden fon dät Kjuus sunt do fjauer Hilte, do dät Jäiden apnieme. In dät Kamrääd is n litjen Stift ounboord un älke Moal wan di Stift unner ankeem, lichte hie ne Holtspoune ap un liet se wier faale as ne Feeder un ju kwad dan ,,knip". Dät waas dan elkemoal n Knip Jäiden un wuud älkemoal buunen (n Biend; dät is 120 moal in n Haspel; wäkke Haspele mouten deerfoar twäie knipje). Dät wäd in n Stuk haspeld, dät sunt tjoon Biend. Dan waas die Haspel ful; dät Jäiden wuude häärunner nuumen un tou n Dokke troald. Do Dokken wuuden dan ätter dän Weeuwer broacht.

Häd me nu njuugen Stuk, dan sunt dät träi Smitte (7½ Äälne) träi Träid, dät is groaf Linnen. Wan dät Jäiden tou dät Linnen kloor is, dan wäd et ap groote Piepen spould, wiertou me do Dokken uum ju Kroune lait. Wan me dan n Lappe hääbe wol fon tweelich Smitte, dan mout me 48 Stuk Skäärjäiden hääbe un 48 Piepen, ap älk een Stuk. Dan wäd dät skäärd twintich Piepen toumoal in n Skäärlaadere. Dan wäide do eerste twintich uum die groote Roome tou skäärd, soloange dät se loos sunt. Un dan kuume twintich friske deeroun un dan sunt der noch oachte, eer do lääste twintich loos sunt, ounsät, un dan soloange skäärd, dät se aal loos sunt. Dan mout et derou kätted wäide un dan kumt et an dät Stäl.

Waas dät Wulle toun braidjen, dan moaste dät foar dät Spinnen noch krassed (keemd) wäide mäd ju Krasse. Ätter dät Spinnen wuud dät dan noch twiend (dubbeld moaked) ap dät Wäil. Dan kuud dät uk haspeld wäide un wuud dan eenfach as Dokken apwoard un ätters tou n Kljoun winneld.

Woudelieste[Beoarbaidje | Quelltext bearbeiten]

Apstok m., Biend n., Boudembrääd n., Dokke f., groote Piepe f., groote Roome m., Haspel m., haspelje, Hilt b., Holtspoune f., Kamrääd n., Kätte f., Kjuus n., Knip n., Kroune f., litje Rääd n., Oakse f., Piepe f., skääre, Skäärlaadere f., spoulje, Stift m., Stuk n., Wäilpiepe f., Wiende f.