Fräisensäärke

Uut Wikipedia
Wikselje tou: Navigation, Säike (08)
Dän Päitersplats as blouked fon ju Päiterssäärke. Die Touden fon de Fräisensäärke is gjuchts ap hoolwe Hööchte
Detail: Ju Fräisensäärke mäd dän Top fon dän Touden in dän buppeste Haaldeel

Ju Fräisensäärke (San Michele dei Frisoni as uk San Michele in Sassia of Santi Michele e Magno) is ne Säärke in Room.

Loage[Beoarbaidje | Quelltext bearbeiten]

Ju Säärke stoant an dän Houk fon do Sträiten Largo degli Alicorni un Via del S. Uffizio, juunuur dän Päitersplats, fluks bie Vatikanstääd, wierfon ju ne exterritorioale Zone is. Me fint dät truch op ju groote Sträite Borgo Santo Spirito 21/41 ju Trappe aptougungen, truch dät Häk un dan links ou.

Ju Fräisensäärke is baud juun aan fon do Roomske Bierge, dän Janiculus, die der gränset an dän Päitersplats. Tonk hiere Loage is ju bewoard blieuwen as in dät 16. Jierhunnert aal Gebäude do der unner an dän Bierich stuuden, oubreeken wuuden foar dän Bau fon ju Päiterssäärke. Ap Gruund fon hieren eensichoardigen geskichtelken Wäid is ju Säärke 1990 fon ju UNESCO touföiged an ju Lieste fon dät Waareldäärwe.[1]

Geskichte[Beoarbaidje | Quelltext bearbeiten]

Wier nu ju Säärke fon do Fräisen stoant, woonde tweelichhunnert Jiere häär ju fräiske Kolonie. Älk, die der uut uus Geegend ätter Room koom, liet sik deer deel. Deer wuud ne Muure uumetou baud un sietdän roat dät in Room ju Skola fon do Fräisen. Uk uur Foulkere hieden sun Betsirk.

Fon ju originelle litje Säärke ju tou ju Siedlenge heerde, is noch niks wierfuunen. Ju skäl fon Kriechsgewalt fernäild wuuden weese. Wie wieten dät ju deer waas un dät ju n Patroon hiede: Michael, die Ärtsängel die der Room insen fon dän Päst befräid häd. Leeter kreech ju n twäiden Patroon bietou: Sänt Magnus, n hälgen Biskup, die hier toufällich loundede, fieuwhunnert Jiere ätter sin Dood. Fuuls tou iewerge Fräisen hieden nämmelk sien Reliquien mee ätter Fräislound nieme wüüld, man deer is n Sköätel foar strieken wuuden un do Reliquien bleeuwen in Room, in ju Säärke, ju der sietdän n dubbelden Noome kreech: Säärke fon Michael un Magnus.

Dan is 1141 ju näie Säärke baud wuuden: gratter un flugger as ju eerste Säärke weesen hääbe mout. Dät waas n romanisken Bau, mäd oolde Pielere un n fluggen Campanile (Klokkentouden). Die Klokkentouden kon me noch altied bekiekje, man ju Säärke sjucht nu gans uurs uut as wan ju baud wuude. Fon 1756-59 wuude ju Säärke tou n tjoskiepigen Pielerbasylika uumebaud un in dät njuugentiende Jierhunnert wuud dät Binnere uk noch so iengriepend annerd, dät bloot litje Eenpeldhaide dät Oaler noch apwiesen dwo. In dät linke Siedenskip fint sik dät Grääf fon dän Moaler Anton Raphael Mengs.

Ju Fräisensäärke is siet 1990 ju eepentelke Säärke fon do holloundske un wäästfräiske Katoolske in Room. Fräisen aastelk fon ju Oamse skällen deer fröier uk waileeken weese.[2] Deerap wiest uk wai, dät ju foar ne bestimde Tied in dät Middeloaler dän Noome hiede fon San Michele in Sassia, dät is Sänt Michael in Sachsen.

Ienmuurde Steene[Beoarbaidje | Quelltext bearbeiten]

Die Wäästfräise Loadewyk Damsma häd foar ju Säärke in 17 Jiere 2700 middeloalerlike Steene sammeld uut Säärken fon aal do Fräiske Lounde.[3] Doo wuuden 2002 in ne Muure in ju Fräisensäärke ienmuurd. Uut Seelterlound sunt Steene fon Klaaster un Roomelse deerbie. Dät sunt do ächte uuroolde Steene, fuunen bie de Kapälle un bie de Säärke.

Ferbiendengen ätter buuten[Beoarbaidje | Quelltext bearbeiten]

 
Bauwierke buuten Seelterlound un do Fräislounde
Scharrel Windmühle.JPG

Säärken
Bäärsel | Elisabethfeen | Ooldenait St. Vitus | Kloppenbuurich St. Andreas | Basilika Bethen | Groote Säärke Nijkerk | Dom fon Utert | Fräisensäärke Room | Päiterssäärke Fatikaanstääd
Määlne
Bäärsel | Geelenbierich | Kloppenbuurich
Uur
Pfannitouden Kloppenbuurich | Chinesiske Muure | Eiffeltouden | Taj Mahal | Kolosseum | Hagia Sophia | Anitkabir

Wällen, Anmäärkengen un Ätterwiesengen[Beoarbaidje | Quelltext bearbeiten]

Wikipedia:Galerie