Bukarest

Uut Wikipedia
Bukarest
Bucureşti
Ienwoonertaal 1.931.838 (1. juli 2007)
Lound Rumänien
Kring: Bucureşti
Fläche: 228 km2
Tiedsone: UTC +2
Websiede: www.pmb.ro

Bukarest is ju Haudstääd fon Rumänien. Der woonje 1.931.838 Ljuude in ju Stääd (2007) un ungefeer 2.6 Millione in ju Agglomeration. Et is ju säkstgrootste Stääd in ju Europäiske Union.

Geschichte[Beoarbaidje | beoarbaidje Wältext]

Bukarest häd neen oolde Geschichte, man ju is truch ju Gruundenge in dät 14. Jierhunnert täämelk näi. Dät rumäniske Woud bucurie betjut Bliedskup, un deeruume wäd ju Stääd uk wäil 'Stääd fon ju Bliedskup' naamd. Deerätter wuude Bukarest ouwikseljend mäd Târgovişte Haudstääd fon ju region Walachei. In 1545 kricht ju Stääd n Stäädmuure.

In do naiste Jiere kreech Bukarest ne oainständige Wirtskup. Ne Uurkunde fon n 13. Moai 1563 wiest ätter ne Präfektuur un 12 Meenteräide. Ju Stääd kreech uk ne Fersuurgengsfunktion foar dät Lound uum ju Stääd un wuude uk wichtich foar ju Hondel mäd dät Osmaniske Riek.

In do ätterfoulgjende Jiere ferhindert ju turske Heerskup dän wirtskuppelke Foutgong fon ju Stääd. In 1595, wilst do Turken ju Stääd äroberje, kumt et tou n Stäädbround. Bie n uur Slacht in ju Naite fon Bukarest in n Häärst fon 1595 looken do Turken sik wieruume un fernäilden n Deel fon ju Stääd. Deeruum wuude Târgovişte ju Haudstääd fon Rumänien. Een jier leeter wuude Bukarest dan tourääch äroberd.

In dät jier 1769 ferjoageden 700 moldauiske Striedere mäd Hälpe fon ju Befoulkenge do in ju Stääd stationierde Turken. Ruske Truppen siegeden ap n 30. Oktober 1771 bie Bukarest juun do Osmanen. In 1880 unner ju Rusk-Aastriekske Turkenkriech fluchtet ap n 26. Oktober 1789 die Fürst Nicolae Mavrogheni mäd 1000 Monljuude uut ju Stääd hääruut. Bukarest wuude ap n 10. November 1789 fon do Aastrieker unner dän Prins Friedrich Josias fon Saksen-Kobuurich-Saalfäld iennuumen un eerst ap n 4. August 1791 wieruume roat. Ferscheedene Natuurkatastrofen un Epidimien, as Äidbieuwjen (1793 un 1802), Pest (1794 un 1812), fjuurbukkel (1804) un uurdriftenge (1805 un 1806) träfden ju Stääd in do naiste Jiere.

In dät 19. Jierhunnert waas Bukarest mongs Frontstääd in ferscheedene Kriege twiske Ruslound, Aastriek un dät Osmaniske Riek. In dät Jier 1861 wuude dan die Stoat Rumänien bilded un Bukarest wuude Haudstääd.

Ap n 6. Dezember 1916, unner ju Eerste Waareldkriech wuude ju Stääd truch düütske Truppen besät un ju Haudstääd fon Rumänien wuude Iaşi. November 1918 wuude Bukarest wier fräi un Bukarest wuude Haudstääd.

In n Oktober 1940 looken düütske Truppen Bukarest binne. Unner ju Twäide Waareldkriech ferboont Rumänien sik mäd dät Düütske Riek un ap Eende fon dän Kriech ap n 23. august mäd doo Allierde. Hitler roate n Befeel tou Bombardierenge fon ju Stääd ap n 24. August 1944. Aan dai leeter ferkloorde Rumänien dän Kriech an Düütsklound. Do Russen looken Bukarest binne ap n 31. August 1944.

In dän Koolde Kriech waas Rumänien n Satellitstoat fon ju Sowjetunion. Midde Dezember 1989 waas die Begin fon ju Foulksapstand juun Nicolae Ceauşescu. Ju Apstand foatede ap n 21. Dezember 1989 in Bukarest oun. Ap n 22. Dezember 1989 kwad ju Stoatsfiersjooseender TVR Rumänien fräi tou weesen. In Bukarest sunt truch ju Revolution 500 moanskene stuurwen.

Befoulkenge[Beoarbaidje | beoarbaidje Wältext]

Bielde:Triumphbogen Bukarest.jpg
Triumfbooge
Dät atheneum
  • 1798 - 30.030
  • 1831 - 60.587
  • 1877 - 178.000
  • 1900 - 282.000
  • 1930 - 639.000
  • 1948 - 1.025.000
  • 1966 - 1.367.000
  • 1977 - 1.807.000
  • 1992 - 2.067.000
  • 2007 - 1.931.838

Kultuur[Beoarbaidje | beoarbaidje Wältext]

Flugge bauwierke in Bukarest sunt:

  • Arcul de Triumf
  • Atheneum
  • Buurich Cotroceni
  • Buurich Mogoşoaia
  • Monumentul Aviatorilor

Museum[Beoarbaidje | beoarbaidje Wältext]

  • Muzeul Naţional de Artă al României (nationoal kunstmuseum fon Rumänien)
  • Bukarest Museum
  • Muzeul Satului
  • Parlamäntspalast

Ienkoopje[Beoarbaidje | beoarbaidje Wältext]

  • Unirii
  • Obor

Ferbiendenge ätter buuten[Beoarbaidje | beoarbaidje Wältext]

Commons Commons: Bukarest – Mediendoatäie