Aastfräisk Huus

Uut Wikipedia

Dät Aastfräiske Huus, uk Gulfhuus namd, is aan Huustyp ut Aast-Fräislound, die ätter dän groote Bround in Schäddel uk in dät Seelterlound ienwonderd is.

[Beoarbaidje] Apbau

Wohnhuus un Staal sunt innnerdoat unner een Teck baut, aober uurs as int eepene Huus, fonunner trännt truch ju Broundmuure. Dät Teck fon dän Staal (Bääterhuus) is wieder häärunnerleeken as dät fon t Wohnhuus (Faanderhuus), wiertruch dät Bääterhuus bradder is. Dät Huus wäd nit fon do Muuren drain, man fon do holten Stiepels int Binnere. Dät Gulfhuus is namd ätter dät Addenleeger inne Midde fon dät Huus, dän Gulf. Die is nit appe Been, man appe Gruund, so dät me eenfach mädde Woain truch ju Grootdoore inne Göäwel appe Toal fiere konn, die Adden ienloagerje un truch ju uur Grootdoore wier ruutfiere konn. Ap ju uur Siede is ju Groupe, do Bäiste stounde un inne bääterste Timpe dät Plumpsklo. Ieuwenske dän Gulf sunt Hukke for Swiene un Koolwere un n Hoangstestaal, wieruur noch n Been for Hoo un Adden is.

[Beoarbaidje] Geschichte

Dät Aastfräiske Huus is äntstounden in t 16. un 17. Jierhunnert in Aastfräislound. Do Buuren brukten n gratteret Leeger, wil jo truch beetere Technik mor Adden hieden. In t foaren reichte dät Leeger appen Been fon t Ooldfräiske Buurenhuus. Fon där on wiedete t sik in gaans Noudwäästdüütsklound un sogoar in Hollound un Flandern ut. Ätter dän groote Bround fon Schäddel 1821 keem t dan uk in t Seelterlound, wier t dan dät epene Huus fertringte.