1. Meerte

Die eerste Meerte is die 60. Dai fon dän Gregorioansken Kalänner (die 61. in Skaltjiere), somäd blieuwe deer noch 305 Deege bit tou dät Eende fon't Jier tou.

Düssen Dai waas in dät oolde Room uurspröängelk die kaländoariske Begin fon dät Jier, die Dai, wier in dän Vesta-Tämpel ap dät Forum Romanum dät hillige Fjuur ounstikt wuude. Vesta wuude as Goddine fon dät Häid-Fjuur fereerd. As do roomske Konsuln in't Jier 153 foar Kristus dän Begin fon hiere Legisloatuur-Periode ap dän eersten Januoar ferlaiden, wuude düt tougliek uk die näie Begin fon dät Jier. Bit däälich kon, wäl Latiensk ferstoant, oun do Noomen fon wäkke Mounde sjo, dät dät uurspröängelk uurs waas: Die September hat so, uumdät hie uurspröängelk dät soogende Mound waas, die Oktober häd sin Noome, uumdät hie uurspröängelk dät oachte Mound waas, die November waas sjuunelk dät njuugende un die Dezember dät tjaande.

Ju Waareld-Organisatsjoon foar Meteorologie häd dän 1. Meerte as meteorologisken Begin fon dät Foarjier ap ju noudelke Hemisphäre fon ju Äide fäästlaid.

Foarfaale

• 499: Ätterdät sik die Aastgooten-Köänich Thiudreiks die Groote (gotisk: 𐌸𐌹𐌿𐌳𐌰𐍂𐌴𐌹𐌺𐍃 𐍃𐌰 𐌼𐌹𐌺𐌹𐌻𐌰 / Thiudreiks sa Mikila; düütsk: Theoderich der Große) foar Poabst Symmachus un juun dän Juun-Poabst Laurentius uutspreeken häd, wäd Laurentius ousät un kricht insteede dät Boantje fon dän Biskop fon Nuceria Alfaterna in Kampanien.
• 705: Johannes VII. wäd foar'n Poabst kädden.
• 1420: Poabst Martin V. ropt in sien Kjuustoachs-Bulle' tou'n Kjuustoach juun do Hussiten ap un loost deer do Hussiten-Kriege mäd uut.
• 1562: Een Riege fon Hugenotten wäd in Wassy fon Katholiken möärend. Dät Bloudboad fon Wassy loost dän Eersten Hugenotten-Kriech in Frankriek uut.
• 1783: Mäd ju Ratifisierenge truch ju lääste Kolonie Maryland treede do fon dän Kontinentoal-Kongräs fon do noudamerikoanske Trättien Kolonien besleetene Konföderatsjoons-Artikkele in Krit, Foarloopere fon ju Ferfoatenge fon do Fereende Stoaten.
• 1792: Troonwiksel in Aastriek un dät Hillige Roomske Riek. As Leopold II. stäärft, foulget sin Suun Franz II.
• 1793: In ju Slacht bie Aldenhoven uurwint Aastriek ju frantsööske Armee, sodät ju dän Dai ätters Aachen touräächärooberje kon.
• 1870: Die Tripel-Allianz-Kriech eendet, as die paraguayiske Diktoator Francisco Solano López in dän Kamp mäd brasilioanske Suldoaten faalt.
• 1903: Ju Dreguuner-Direktsjoon fon Dresden fiert ju Unnersäikenge fon Finger-Oudrukke tou ju Apkloorenge fon Ferbreeken in Düütsklound ien.
• 2018: Carles Puigdemont, die in't Exil fäästsit, fertichtet foar't eerste ap sien näie Kandidoatuur as kataloansken Regionoal-Präsident.

Tou Waareld keemen

• 1445: Sandro Botticelli, italieensken Moaler fon ju Renaissance
• 1810: Frédéric Chopin, poolsk-frantsöösken Komponist (Doatum uunseeker, deer wäd toumäts uk die 22. Februoar ounroat)

Stuurwen

• 492: Felix II., Poabst
• 965: Leo VIII., Poabst
• 1792: Leopold II., Äärts-Heertoach fon Aastriek, Köänich fon Böömen, Ungarn un Kroatien, Kaiser fon't Hillige Roomske Riek
• 1870: Francisco Solano López, paraguayisken Diktoator.